پاشنیوەرۆی رۆژی یەکشەمە ٢٧ی سەرماوەز، شاندێکی تەڤگەری جڤانین کوردی رۆژئاوا بەسەرپەرەستی عیماد یوسف سکرتێری گشتیی ئەو رێکخراوە، سەردانی سکرتاریای یەکیەتیی لاوانی دێموکراتی رۆژهەڵاتی کوردستانیان کرد و، لەلایەن شاندێکی یەکیەتیی لاوان بە سەرپەرەستی سکرتێریی گشتیی رێکخراو، پێشەوا عەلی پوور پێشوازییان لێکرا.
پێشەوا عەلی پوور سکرتێری گشتیی یەکیەتیی لاوان وێڕای ئاماژەدان بە دۆزی ئێستای کورد و پەرتەوازەیی نێوان هێز و رێکخراوەکانی چوارپارچەی کوردستان، باسی لە کۆمەلێک چالاکی و دەستپێشخەری یەکیەتیی لاوان کرد و، هیوای خواست کە هەموو رێکخراوەکانی چواربەشی کوردستان پەیوەستی ئەم چالاکی و دەستپێشخەریانەی یەکیەتیی لاوان بن و، رۆژە نیشتمانییەکان وێکڕا بکەنە دەرفەتی لەدەوری یەک کۆبوونەوە و دیالۆگ بۆ گەیشتن بە ئەنجامێک کە خواستی نەتەوەکەمانە.
پاشان عیماد یوسف سکرتێری تەڤگەری جڤانێن کورد، وێڕای پشتگیری لە پڕۆژەکانی یەکیەتیی لاوان باسی لە کۆمەڵێک بابەتی پێوەندیدار بە خۆیانی کرد و، سەرەتا ئاماژەی بە دامەزرانی تەڤگەرەکەیان کرد کە لەسەر رێبازی پێشەوا قازی و قاسملوو و بارزانی دامەزراوە و ئامادەیە لە پێناو یەکگوتاری لاوانی کورد لەگەڵ هەموو رێکخراوەکان دیالۆگ بکەن.
پاشان باسی لە تێکۆشانی رێکخراوەکەیان لە رۆژئاوای کوردستان و بەربەستەکانی بەردەم جالاکییەکانیانی کرد.
یەکیەتیی لاوانی دێموکراتی رۆژهەڵاتی کوردستان وێڕای پشتگیری لە هەوڵە نەتەوەییەکانی ئەم تەڤگەرە و تێکۆشانیان بە نسبەت لاوانی رۆژهەڵاتی کوردستان، بەڵێنی هاوکاری لە کاری رێکخراوەیی و نەتەوەییدا پێدان.
شایانی باسە ئەندامانی شاندی هەر دوولا سەرنج و تێبینیەکانیان سەبارەت بە کۆمەڵێک پرسی دیکە ئاڵوگۆڕ کرد.