ئه‌ندامان و لایه‌نگرانی حیزبی دێموکراتی کوردستان!
کادرو پێشمه‌رگه تێکۆشه‌ر و فیداکاره‌کانی کوردستان!
بنه‌ماڵه‌ی سه‌ربه‌رزی شه‌هیدان و پێشمه‌رگه‌کان!
به بۆنەی هاتنی ٢٦ی سەرماوەز، ڕۆژی پێشمەرگە و ڕۆژی ئاڵای کوردستان، گه‌رمترین پیرۆزبایی خۆمان پێشکەشی کۆمه‌ڵانی خه‌ڵکی کوردستان بە گشتی و، رۆڵه به ئه‌مه‌گ و گیان له‌سه‌ر ده‌سته‌کانی نەتەوەکەمان، واته پێشمه‌رگه گیانبازه‌کانی کوردستان بە تایبەتی ده‌که‌ین.
٢٦ی سه‌رماوه‌ز (١٦ی دیسامبر) رۆژێکی گرینگە لە مێژووی جووڵانه‌وه‌ی رزگاریخوازانه‌ی نه‌ته‌وه‌که‌مان‌دا. ٧١ ساڵ له‌مه‌و پێش به ده‌ستی رۆڵه دڵسۆز و به ئه‌مه‌گه‌کانی گه‌له‌که‌مان ئاڵای پیرۆزی کوردستان وه‌ک هێمایه‌کی نه‌ته‌وه‌یی له به‌شێک له شار و گونده‌کانی رۆژهه‌ڵاتی کوردستان هه‌ڵکرا و شه‌کایه‌وه. به مه‌ودایه‌کی کورت پاش ئه‌م رووداوه، ناوی “پێشمه‌رگه” له‌سه‌ر خه‌باتکار و به‌رگریکاری نیشتمانیی کورد دانرا. “هێزی پێشمەرگە” و “ئاڵای کوردستان” لە داهێنان و دەسکەوتە هەرە بە نرخەکانی حیزبی دیموکراتی کوردستان و کۆماری کوردستان بە سەرۆکایەتیی پێشەوا قازی محەمەدن. له‌و کاته‌وه “ئاڵا” و “پێشمه‌رگه” بوونه شوناس و پێناسه‌ی نه‌ته‌وه‌ییمان. ئاڵای کوردستان و پێشمه‌رگه بوونە سومبول و هێمای خه‌بات و به‌رگری و تێکۆشان و نه‌سره‌وتن. بوونە هه‌وێنی هاوکاری و یه‌کگرتوویی نه‌ته‌وه‌یی لە نێوان ڕۆڵەکانی گەلی کورد و هێزە سیاسییەکانی کوردستان لە بەشە جیاوازەکانی نیشتمانەکەمان. ئه‌م هێمایانە وه‌ک ئه‌ستێره‌یه‌کی پڕشه‌نگدار ئاسمانی کوردستانیان روون کردۆته‌وه و بروسکه ئاسا دڕیان به‌شه‌وه زه‌نگی زوڵم و تاریکی داوه.
بیرو باوه‌ڕی شۆرشگێڕانه و ئامانجی رزگاریخوازانه، هاندەری سەرەکیی هێزی پێشمه‌رگه بووە بۆ پارێزگاری لە نەتەوە و نیشتمان و، گیانبەختکردن لەم ڕێگایەدا. پێشمه‌رگه وه‌ک هێزێکی وڵاتپارێزو رزگاریده‌ر له ژێر ئاڵای پیرۆزی کوردستان و له پێناو خاک و وڵاته‌که‌ی دا هه‌میشه وه‌ک قه‌ڵایه‌کی له‌گیران نه‌هاتوو به‌رگریی کردوه و نه‌یهێشتووه دوژمنانی گه‌له‌که‌مان به نیاز و خه‌ونه چه‌په‌ڵه‌کانیان ، که تێکشکاندنی خەباتی ڕزگاریخوازی‌و له نێوبردنی شوناس کلتووری نه‌ته‌وه‌ییمان بووه، بگەن. رۆڵه دڵسۆزه‌کانی ئه‌م خاک و نیشتمانه، نه‌وه دوای نه‌وه له پێناوی پاراستنی ماف و ویسته ره‌واکانی نەتەوەی کورددا بوون بە پێشمەرگەو فیداکارییان کردوه و ئاماده بوون له‌م رێگایه‌دا بمرن به‌ڵام هه‌رگیز ته‌سلیمی زۆرداری و بندەستی نه‌بن.
له قۆناغی ئێستای خه‌باتی نه‌ته‌وه‌یی و دێموکراتیی گه‌له‌که‌شماندا پێشمه‌رگه هەر وا هێما و رەمزی خۆڕاگریی نەتەوەی کورد بەرامبەر زۆرداریی زەوتکەرانی مافەکانی نەتەوەی کوردە. جگە لەمەش نەک هەر لە ڕوانگەی خەڵکی کوردستانەوە، بەڵکوو لە ڕوانگەی ناوه‌نده‌کانی بڕیارده‌ری جیهانیش هێزی پێشمەرگە وه‌ک هێزێکی ئاشتیخواز و داکۆکیکاری ئازادی پێناسه ده‌کرێ و ، رێز له ئازایه‌تی و له‌خۆ بردوویی ده‌گیرێ
هۆگرانی پێشمەرگەو ئاڵای کوردستان!
بەشدارانی بەڕێزی یادی ٢٦ی سەرماوەز!
رۆژهه‌ڵاتی نێوه‌ڕاست به‌گشتی و ئه‌م ناوچه‌یه‌ی که کوردستان و نەتەوەی دابەشکراوی کوردی تێدا هەڵکەوتووە بە تایبەتی، له ئاڵۆزترین ناوچه‌کانی جیهانن. هاتنی داعش وەک هێزێکی توندڕەوو دواکەوتوو و دژە مرۆیی بۆ ناو گۆره‌پانه‌که، ئه‌م ناوچه پڕ کێشه‌یه‌ی هێنده‌ی دیکه ئاڵۆزتر کردوه. ناکۆکی و ململانێی نێوان وڵاتانی ناوچه‌که و حوزووری زلهێزه‌کانی جیهان و وڵاتانی خاوه‌ن به‌رژه‌وه‌ند، دۆخی رووداوه‌کانی به ئاقارێکی دیکه‌دا بردوه. له دوو ساڵ و نیوی ڕابردوودا ئه‌م ناوچانه بوونه شوێنی ته‌راتێن و پێکدادانی توند و خوێناویی چه‌ندین هێز و لایه‌نی ناوچه‌یی و نێوده‌وڵه‌تی. قوربانیانی سه‌ره‌کیی ئه‌م شه‌ڕه خه‌ڵکی بێدیفاع و ژن ومنداڵ و پیرو په‌ککه‌وتوو بووه. له ئاکامی ئه‌م شه‌ڕ و ململانێیانە دا سه‌ره‌ڕای قووڵتر بوونه‌وه‌ی کێشە سیاسی و ئابووری و نه‌ته‌وه‌یی و مه‌زهه‌بیه‌کان له نێوان پەیڕەوانی ئایین وئایینزا جیاوازەکان دا، ژێرخانی ئابووریی ئه‌م وڵاتانه به ته‌واوی رووخاوه. به میلۆنان که‌س ئاواره و بێ ماڵ و حاڵ بوون، به سه‌دان هه‌زار که‌س کوژراو بڕیندار بوون‌و بوون بە ده‌سته‌چیله‌ی ئه‌م شه‌ڕه، به بێ ئه‌وه‌ی هیچ ده‌ستکه‌وتێکیان هه‌بێ.
به‌شێکی زۆری کوردستان له باشوور و رۆژئاواوە له نێو جه‌رگه‌ی ئه‌م کاره‌سات و رووداوانه‌دا بوون و هه‌ن. له‌ئاکامی هێرش و په‌لاماری داعش بۆ سەر گەلی کورد لەم دوو بەشەی کوردستان به هه‌زاران که‌س گیانیان به‌خشیوه یا بە دیل گیراون و به‌دەیان هه‌زاری دیکه ئاواره بوون. به‌ڵام سه‌ره‌ڕای ئه‌م کاره‌ساته دڵته‌زێنانه ڕۆڵەکانی نەتەوەی کورد لە بەرگی پیرۆزی پێشمەرگە و به‌رگریکاری کورددا، داکۆکییان لە خاکی کوردستان و نەتەوەکەیان کردوە ، پاشه‌کشه‌یان به هێزه په‌لامارده‌ره‌کان کردوه و ناوچه داگیر کراوه‌کانیان رزگار کردوه و هەر وا وەک شوورەیەکی پۆڵایین لە بەرامبەر پەلاماردەرانی خاکی کوردستاندا ڕاوەستاون.
ئەوەی لە پێوەندی لە گەڵ رووداوکانی ئەم ناوچە پڕ ئاڵۆزییە دا جێگای سەرنجە، هەوڵی هێندێک لە دەوڵەتانی ناوچەیە کە بە ناوی پشتیوانی لە خەڵکی عێراق و سووریە لە بەرامبەر داعش و گرووپە توندڕەوەکانی دیکە، هاتوونە نێو ڕووداوەکان و بوون بە لایەنێکی شەڕ و ململانێیەکان. ئەو دەوڵەتانە هه‌وڵ ده‌ده‌ن ئه‌م هه‌له‌ی که بۆ کورد ره‌خساوه له‌باری به‌رن و کۆسپ له‌سه‌ر رێگای گه‌شه کردن و پێشکه‌وتنی هه‌رێمی کوردستان و ناوچه رزگارکراوه‌کانی رۆژئاوای کوردستان دروست بکه‌ن و بۆ پاراستنی به‌رژوه‌ندییه‌کانیان و قایم کردنی جێی پێی خۆیان ئاماده‌ن هه‌ر کارێک بکه‌ن. کۆماری ئیسلامیی ئێران، کە ئاژاوەگێڕی و دەستتێوەردانی کاروباری وڵاتانی ناوچە و تێرۆر و تێرۆریزم بەشێکی سەرەکی لە ڕابردوو و ناوەرۆکی ڕێژیمەکەی پێک دێنن، ئێستا بۆته به‌شێک له‌و شه‌ڕه و به ناوی شه‌ڕی دژی تیرۆر و پاراستنی شوێنه پیرۆزه‌کان، پشتیوانی له دیکتاتۆرترین و خوێنرێژترین ڕێژیمی ئه‌م ناوچه‌یه ده‌کا، و ناکۆکی، ململانێ و شه‌ڕی مه‌زهه‌بی لە ناوچەکە دا پەرە پێ دەدا.
سه‌ره‌ڕای هه‌موو پیلان و هەوڵەکانی دەوڵەتانی دژە کوردی ناوچە، کورد یەکێک لە فاکتەرە گرنگەکانە کە هێزە جیهانی و ناوچەییەکان ناتوانن حیسێبی بۆ نەکەن. وەک دەبینین لە شەڕی جیهانیی دژە تیرۆر دا نەتەوەی کورد، هاوپەیمان و هێزێكی سەرەکییە و ئەم ڕاستییە و کۆمەڵیک هۆکاری دیکە وایان کردوە، لە ئاستی نیودەوڵەتی دا، پرسی کورد و نەتەوەی کورد،پشتیوانییان لێ بکرێ. ئەمە گۆرانێکی گرنگە لە مێژووی پرسی کورددا که ده‌رفه‌تێکی باشی بۆ ئەم نەتەوەیە ڕەخساندوە تا بتوانێ بۆ خۆشی قسەی لە سەر چارەنووسی خۆی هەبێ. بەڵام ئه‌گه‌ر فاکته‌ره ده‌ره‌کییه‌کان یارمه‌تیده‌ر و هاوکاری ئه‌م هه‌ل ومه‌رجه بن، به‌داخه‌وه فاکته‌ره نێوخۆییه‌کان لە بەرژەوەندی دۆخه‌که‌دا نین. نایه‌کگرتوویی و نه‌بوونی هاوکاری له نێوان هێز و لایه‌نه سیاسییه‌کان و لەمەش خراپتر ململانێی زیانبار، وایان کردوە بەم جۆرەی پێویستە سوود له‌م هه‌له زێڕینه وەرنەگیرێ. ڕاستییەکەی ئەوەیە یەکگرتووییەکی نیوخۆیی لە ئاستی هەرێمی کوردستان و هاوپەیمانەتییەکی نەتەوەیی لە ئاستی هەموو کوردستان بە تایبەتی لە ئاستی هێزە سیاسییە سەرەکییەکان دا پیویستە، بۆ ئەوەی هەلومەرجی ناوچەیی و جیهانی بە قازانجی پرسی کورد بقۆزرێتەوە. ئەگەر ئەم یەکگرتوویی و هاوپەیمانەتییە وەدی نەیە، به‌رپرسیاره‌تییەکی مێژوویی ده‌که‌وێته سه‌رشانی هێزە سیاسییەکانی کوردستان و مێژوو زۆر بێ به‌زییانه قه‌زاوه‌تیان له‌سه‌ر ده‌کا و مه‌سه‌لەی کوردیش بۆ قۆناغێکی نادیار دوا ده‌که‌وێ.
خەڵکی پێشمەرگەپەروەر و ئاڵاپارێزی ڕۆژهەڵاتی کوردستان!
لە ٧١ سالەی هەڵکرانی ئالای کوردستان لەڕۆژهەڵاتی کوردستان و ناودێر کردنی تێکۆشەری چەکداری کورد بە ناوی پێشمەرگە، بە پێویستی دەزانین گەرمترین ڕێز و پێزانینمان پێشکەشی ئێوە بکەین کە لە ماوەی 7 دەیەی ڕابردوو دا، تێچووی بەردەوامیی ڕێگا و ئامانجەکانی کۆماری کوردستان لە سەر شانی ڕۆڵەکانی ئێوە بووە. ئاڵای کوردستان لە هەناوی خەبات و تێکۆشانی ئێوە بۆ مافە نەتەوەییەکانتان بە ڕێبەریی حیزبی دیموکراتی کوردستاندا، لە دایک بووە. هەر وەها هێزی پێشمەرگە کە لە ئامێز و داوێنی جمهوورییەکەی زێد و نیشتمانی ئێوە بە سەرۆکایەتیی پێشەوا قازی محەممەد، هاتە نێو گۆڕەپانی خەبات. بۆ زیاتر لە ٧٠ ساڵ دەچێ کە ئێوە لە پشتیوانیی حیزبی دیموکراتی کوردستان درێغتان نەکردوە. هاندەری ڕۆڵەکانتان بوون تا لە ڕیزەکانی ئەم حیزبە دا، بۆ دووبارە کردنەوە و ژیاندنەوەی هیوا و ئامانجەکانی کۆماری کوردستان، خەبات بکەن و ببن بە ئەندامی حیزب و پێشمەرگەی کوردستان. چەکی بەرگری لە کەرامەتی نەتەوەکەیان بکەنە شان و ئالا جوانەکەی کۆماری کوردستان شەکاوە ڕابگرن.
حیزبی دیموکراتی کوردستان دڵنیایە کە ئاوات‌و هیوای ڕزگاربوون لە بندەستی‌و گەیشتن بە مافە نەتەوەییەکان، هیوا و ئارەزووی زۆربەی هەرە زۆری تاکەکان لە ڕۆژهەڵاتی کوردستانە. ئەو جموجۆڵ و چالاکیانەی ئێوە بۆ پاراستنی شوناسی خۆتان و بەرگری کردنتان لە زمان و خاک و کولتووری خۆتان، هەر وەها دەنگ هەڵبڕینتان بۆ نەهێشتنی هەڵاواردن و ستەمی نەتەوەیی و زمانی، تەواوکەر و درێژ کراوەی ئەو هەوڵ و تێکۆشانەیە کە حیزبی دیموکرات و هێزە سیاسییەکانی دیکە لە پێناوی بەرەو پێشبردنی پرسی کورد لە ئێران، بەڕێوەی دەبەن. ئەگەر ئەندامانی حیزب بە شەکاندنەوەی ئاڵا و سروودی نەتەوەیی و کاری شۆڕشگێرانە، دەیانەوێ ئیرادەی گەلەکەمان بۆ ڕزگاری لە ستەمی نەتەوایەتی بنوێنن، ئەگەر هێزی پێشمەرگەی حیزبی دیموکراتی کوردستان بە ئامادەبوون لە نێو کۆمەڵانی خەڵکی ڕۆژهەڵاتدا، پەیامی کۆڵنەدان و بەردەوامی لە خەبات تا گەیشتن بە ڕزگاری و ئازادی بە گوێی ڕێژیمی کوردکوژی کۆماری ئیسلامی ڕادەگەیەنێ، ئەگەر تێکۆشەرانی ئەم حیزبە لە مەیدان و بوارەکانی دیپلۆماسی و مافی مرۆڤ و راگەیاندن دا، دەنگی ستەملێکراوی وحەقخوازانەی ئێوە بە گوێی جیهانییەکان دەگەیەنن، ئێوەش پێویستە لە نێوخۆی وڵات، بە گوێرەی ئیمکان و بارودۆخی نیوخۆ، هەر چی زیاتر بۆ ئامانجە نەتەوەییەکانتان خەبات بکەن.
ئێمە پێمان وایە شوناس و ئامانج و هێما نەتەوەییەکانمان دەتوانن هەم لە نێوان تاکەکانی کورد لە نێوخۆی ڕۆژهەڵاتی کوردستان، هەم لە نێوان هێز و لایەنە سیاسییەکانی ئەو بەشە، هەر وەها لە نێوان لایەنە سیاسییەکان و کۆمەڵانی خەڵک دا، هەوێنێکی بە هێز و بەستێنێکی لە بار بن بۆ هاوکاری و یەکگرتوویی.
بۆیە لە ڕۆژی ٢٦ی سەرماوەز، ڕۆژی ئالا و ڕۆژی پێشمەرگەی کوردستان دا، بانگەوازی یەکیەتی و پەیامی پێویستیی یەکگرتن و پێکەوە بوون بەرەورووی هێز و لایەنە سیاسییەکان و هەروەها بەرەورووی ئیوە چین و توێژە جیاوازەکانی خەڵکی ڕۆژهەڵاتی کوردستان دەکەینەوە.
هاوکاری و یه‌کگرتوویی هێزو لایه‌نه سیاسیه‌کانی کوردستان زامنی به‌ره‌وپێش چوونی خه‌بات و تێکۆشانی میللی ـ دیموکراتیکی گه‌له‌که‌مان و ده‌سته‌به‌رکەری ماف و داخوازه ره‌واکانی خه‌ڵکی زوڵم لێکراو و به‌ش مه‌ینه‌تی کوردستانه. هەر بۆیە هیوامان ئەوەیە بانگەوازی ئێمە بۆ یەکێتی و یەکگرتوویی و هاوکاری لە لایەن هێز و لایەنە سیاسییەکانەوە، پێشوازیی لێ بکرێ. تەنیا ڕێگای لەپەراوێز دەرهێنانی ڕۆژهەڵاتی کوردستان و پرسی کورد لە ئێران، ئەوەیەکە هەم هێز و لایەنە سیاسییەکانی ئەو بەشە، لە ژێر چەتری هاوپەیمانەتییەک دا یەک بگرن و پلان و بەرنامەی جێددی بۆ تەنگ هەڵچنین بە کۆماری ئیسلامی بخەنە روو، هەم خەڵکی ڕۆژهەڵاتی کوردستان، پێویستە ڕۆژبەڕۆژ زیاتر بێنە مەیدان و بە سوود وەرگرتن لە خەباتی هێمنانە، مەدەنی و جەماوەری و هەر شێوەیەکی گونجاوی دیکە، داوای مافەکانی خۆیان بکەن و ئەم ڕێژیمە ناچار بە پاشەکشە بکەن.
پێشمەرگە قارەمانەکان!
لاوانی دڵ پڕلە خۆشەویستیی ئاڵای کوردستان!
لەم ڕۆژە دا بە گەرمی پیرۆزبایی لە ئێوە و هەموو ئەو کەسانە دەکەین کە لە سەنگەری بەرگری لە خاکی پیرۆزی کوردستان و لە پێناوی شەکانەوەی ئاڵا و بەرزکردنەوەی ناوی کوردستان دا، خەباتیان کردوە و خەبات دەکەن. سڵاو بۆ گیانی پێشمەرگە شەهیدەکان و سڵاو بۆ بنەماڵە سەربەرزەکانیان. سڵاو بۆ ئەو لاوانەش کە ناهێڵن چەک و ئاڵای دەستی شەهیدەکان، بکەوێتە سەر ئەرز و سەنگەر و جێگای بەتاڵی شەهیدەکان پڕ دەکەنەوە.
جەژنی ئەمڕۆمان هاوکاتە لە گەڵ جەژنی تەواوبوونی ده‌وره‌ی ٢٢٠ی سه‌ره‌تایی فێرگه‌ی سیاسی ـ نیزامی حیزب. هەر ئەمڕۆ پۆلێکی دیکە لە لاوانی کوردستان بە ڕەسمی هاتنە ڕیزی پێشمەرگەکانی دیموکرات. بە دەرفەتی دەزانین لەم بۆنەیە دا پیرۆزبایی لەوانیش بکەین و سەرکەوتنیان لە ئەرکی پیرۆزی پێشمەرگایەتیدا بە ئاوات بخوازین.
هەر شەکاوە بێ ئالای کوردستان،
سەرکەوتن بۆ هێزی پێشمەرگە و خەباتی پێشمەرگانە لە پێناوی رزگاریی نەتەوەی کورد و خاکی کوردستان،
ـ به‌رده‌وام‌و پته‌وتر بێ په‌یوه‌ندیی نێوان هێزی پێشمه‌رگه و کۆمه‌ڵانی خه‌ڵكی کوردستان.
جارێکی دیکە رۆژی ئاڵا و ڕۆژی پێشمه‌رگه‌ی کوردستان له هه‌موو دڵسۆزان و ئۆگرانی ئازادی و رزگاری به‌تایبه‌تی پێشمه‌رگه قاره‌مانه‌کان پیرۆز بێ.
حیزبی دێموکراتی کوردستان
ده‌فته‌ری سیاسی
٢٦ی سه‌رماوه‌زی ساڵی ١٣٩٥ی هه‌تاوی
