حکوومەتی تورکیه لەبارەی رەوشی تەندروستیی هاوسەرۆکی پارتی دیموکراتیکی گەلان (هەدەپە) راگەیەندراوێک بڵاو دەکاتەوە.
رۆژی دووشەممە، ئایهان بیلگەن، پارلمانتاری تورکیه و وتەبێژی هەدەپە رایگەیاند، کە رەوشی تەندروستیی سەڵاحەدین دەمیرتاش، هاوسەرۆکی هەدەپە ناجێگیرە و تووشی جەڵتەی دڵ بووە و هەدەپەش زۆر نیگەرانه.
رۆژی سێشەممە وەزارەتی دادی تورکیه راگەیەندراوێکی بڵاوکردەوە و تێیدا رایگەیاند، سەڵاحەدین دەمیرتاش تووشی جەڵتەی دڵ نەبووە و ”رەوشی تەندروستیی دەمیرتاش باش و جێگیرە“.
وەزارەتی دادی تورکیه هەروەها رایگەیاندووە، کە دوای پشکنینی پزیشکی دەرکەوتووە، رێژەی کۆلیستڕۆل (چەوری)ی لەشی هاوسەرۆکی هەدەپە بەرز بۆتەوە، بەڵام ئێستا تەندروستییەکەی جێگیرە.
شایانی باسه سەڵاحەدین دەمیرتاش لەلایەن هێزە ئەمنییەکانی تورکیەوە بە تۆمەتی هاوکاریکردنی پارتی کرێکارانی کوردستان (پەکەکە) دەستگیرکرا و تاوەکو ئێستا لە زیندانی “ئەدیرنە” زیندانی کراوە.
