بەرپرسی شووڕای ئەمنیی هەریمی کوردستان داواکارە کە هێزە چەكدارە نافەرمییەکان رێگەیان پێنەدرێ لە شەڕی ئازادکردنی موسڵدا بەشداریی بکەن.
مەسرور بارزانی بە ناو هێنان لە “حشدالشعبی” وەک هێزێکی چەکداری نارەسمی رایگەیاند کە نابێ لە شەڕی ئازادکردنی موسڵدا بەشدار بن.
ناوبراو لە چاوپێکەوتنی لەگەڵ ژێنراڵ “ئیستیفان تاونسێند” فەرماندەی هێزی هاوپەیمانی نێونەتەوەیی لە عێراق، لەسەر بەشداری پێنەکردن بە هێزە چەکدارە نافەرمییەکان پێداگریی کرد.
مەسرور بارزانی لەم بارەوە رایگەیاند: “ئەو هێزە چەکدارانە کە لە دەرەوەی چوارچێوەی یاسایی خەریکی چالاکیی نیزامین لە عێراقدا، نابێ لە شەڕی ئازادکردنی موسڵدا بەشدار بن، چونکە ئەم بابەتە بۆتە هۆی پەرەپێدان بە توندوتیژی ئایینی و ئاژاوەنانەوە لە عێراق.
لە بڵاوکراوەیەک کە لەم بارەوە شووڕای ئەمنیی هەرێمی کوردستان دەریکردووە، هاتووە کە لەو چاوپێکەوتنەدا دوای تاوتوێ کردنی ئاخرین هەلومەرجی عێراق، بەتایبەتی شەڕی ئازاد کردنی موسڵ لەم بارەوە مەسرور بارزانی بە ئاماژەدان بەوە کە چەکدارانی “حشد الشعبی” لە لایەن ئێرانەوە پاڵپشتییان لێدەکرێ و بە تەمای پشێویی و شەڕی تایفەگەری و کوشتنی خەڵکی سوننی مەزهەبی عێراقن.
هەواڵەکان باس لەوەدەکەن کە چەکدارانی “حشدی الشعبی” لە ناوچە سوننی نشینەکاندا دەستیان داوەتە توندوتیژی و کوشتنی خەڵکی بێتاوانی ئەو ناوچانە.
پێشتریش میلیشیاکانی “حشدی الشعبی” کە ئێران پاڵپشت و هاندەرییانەو، لەلایەن سپای قودسی کۆماری ئیسلامیی ئێرانەوە پشتیوانییان لێدەکرێ، بەهۆی کوشتن و بڕینی خەڵکی سوننی عیراقەوە، لە لایەن دیدەوانی مافی مرۆڤی رێکخراوی نێونەتەوەییەوە بە پێشلکاریی و سەرەرۆیی لە عێراق تاوانبار کراون.
شایانی باسە لە چەند حەتووی ڕابردوودا چەند نوێنەری پارلمانی عێراق داواکاریی لەم چەشنەیان خستۆتەڕوو کە رێگە بە میلیشیاکانی “حشدی الشعبی” نەدرێ تاکوو لە شەڕی موسڵ بەشدار بن.