لە درێژەی شەپۆلی هاوسۆزی وپشتیوانی کردنی خەڵکی کورد لە دەسبەسەرکرانی رێبەران ونوێنەرانی پارتی دێموکراتیکی گەلان لە لایەن دەوڵەتی تورکیەوە
سەد چالاکی سیاسی و مەدەنی لە شارەکانی رۆژهەڵاتی کوردستان بە واژۆ کردنی نامەیەک کردەوەی نادێموکراتیکی ئەردۆغانیان مەحکووم و پشتیوانی خۆیانیان لە رێبەران وهاوسەرۆکەکانی هەدەپە دەربڕی.
بە پێی هەواڵی ماڵپەڕی موکریان، چالاکانی کورد هاوکات لە گەڵ پشتیوانی کردنیان لە ویستی مافخوازانەی گەلی کورد لە باکووری کوردستان داواکارن کە لە زووترین کاتدا ، دەوڵەتی ئەردۆغان پرۆسەی دانوستانەکان دەسپێبکاتەوە و رێز لە دێموکراسی ودیالۆگ بگرێت.
نامەی سەد چالاکی رۆژهەڵاتی لە ژێر ناوی “بەڵی بۆ دیالۆگ ودێموکراسی،نا بۆ دەسەڵاتی رەهای تاک حیزبی” هەڵویست ورەخنەگرتنێکی توندە لە سەرەڕۆیی دەوڵەتی ئانکارا و ئەو بەربەستانەی کە لەسەر رێگەی ئاشتی ودێموکراسی دایناوە.
لە بەشیک لەونامەیەدا هاتووە؛ کاروانی مافخوازی و دیموکراسیخوازیی گەلی کورد لە تورکیا لە ڕێڕەوەی بەرەوپێشچوونی خۆی، هاوکات و هاوتەریب لە شێوەگەلی جیاوازی خەبات کەڵکی وەرگرتووە و توانیویەتی سەرەڕای چەندین کۆسپ و تەنگەژە و کوودەتای چەند بارە و لەمپەری بە ناو یاسایی، لە قاڵبی پارتی سیاسی و لە پارلەمان و دەرەوەی پارلەماندا چالاکیی خۆی بەردەوام بکات .
چالاکانی رۆژهەلاتی بە هەڵسەنگاندنی دۆخی ناوچەکەو هەڵسوکەوتی وڵاتانی نادێموکراتیک بەرانبەر بە گەلی کورد لە درێژەی نامەکەیان دا دەڵێن: دەستبەسەرکردنی سەرکردە و نوێنەرانی هەدەپە تەنیا کێشەکان قووڵتر دەکاتەوە و ئەگەری دروستبوونی شەڕێکی دژوار دوور لە چاوەڕوانی نییە. پێویستە دەوڵەتی تورکیە لە هەر کارێک کە پێش لە ڕەخساندەنی دەرفەتی دیمۆکراسی و وتووێژ دەگرێت خۆ بپارێزێ و جارێکی دیکە بۆ سەر مێزی دانوستان و لێک تێگەییشتن بگەڕێتەوە و بەردەنگ و بەرانبەرەکانی بە فەرمی بناسێت.
لە کۆتایی ئەو نامەیەدا هاتووە ؛ ئێمە چالاکوانانی سیاسی و مەدەنی و هاووڵاتییانی کوردستانی ئێران، دەستبەسەرکردنی نوێنەران و هاوسەرۆکانی هەدەپە شەرمەزار دەکەین و لە زووترین کاتدا خوازیاری ئازادییانین.
