سەرۆک کۆماری یەمەن رایگەیاند: کۆماری ئیسلامی پشتیوانی ئەلقاعیدەیە
بە پێی هەواڵی رۆژنامەی “العربیە” رۆژی ١٧ی خەزەڵوەر سەرۆک کۆماری یەمەن مەنسوور هادی ڕایگەیاند؛ کە ئەزموونی شەڕوناکۆکییەکانی ناوچە،بەتایبەتی لە وڵاتی یەمەن دەرخەری ئەم ڕاستییەیە کە لە نێوان کۆماری ئیسلامی ئێران و ئەلقاعیدەو گرووپە تێرۆریستییەکان پێوەندیەکی پتەو هەیە.
نابراو هەروەها گوتی: ئەوەی لەم یەک دوو ساڵەدا بەسەر وڵاتی یەمەن هاتوە دەریدەخا کە دەوڵەتی تاران گرووپە تێرۆریستییەکان بۆ ئاژاوەنانەوە و دەستێوەردان لە وڵاتانی ناوچە بە کار دێنێ. بەرچاوترین نموونەش لەم بارەوە هاوکاری وهاوئاهانگی نێوان کۆماری ئیسلامی وئەلقاعیدەو حووسییەکانی یەمەن ،لە کوشتنی خەڵک و هەوڵدان بۆ داگیرکردنی ئەم وڵاتەیە.
مەنسوورهادی سەرۆک کۆماری یەمەن بە باس کردن لە سەر پێوەندیی کۆماری ئیسلامی ئێران و گرووپە توندئاژۆکان دیسان کۆمەڵگەی نێودەوڵەتیی بە نیسبەت سەرەڕۆیی و دەستێوەردانی ئەو رێژیمە لە ناوچە ، وریاکردەوە.
ئەمە لە کاتێکدایە بەرپرسانی باڵای رێژیم دەستێوەردان لە وڵاتانی ،یەمەن و سووریە ولوبنان بە بەشێک لە سیاسەتی کۆماری ئیسلامی لە قەڵەم دەدەن و لەم بارەوە رەحیم سەفەوی لە رێوڕەسمی ناشتنی سەردار هەمەدانی کە لە شەڕی سووریە کوژرابوو رایگەیاند کە قووڵایی ستراتێژی نیزام ،لە خاکی سووریەو عیراق و لوبنان دایە و سپای پاسداران بەشداری کردن لە شەری سووریە بە ئەرکی خۆی دەزانێ.
هەرلەم بارەوە ماوەیەک لەمەوپێش سیاسەتمەدارو سەرۆک وەزیری پێشووی لوبنان سەعەد حەریری بە توندی رەخنەی لە پیلان وسیاسەتەکانی کۆماری ئیسلامی گرت و رێژیمی تارانی بە پەرەپێدان بە گرژی و بکوژی خەڵکی بێتاوانی سووریە و یەمەن وعێراق بە تاوانبار زانی.
