کوردانی یارسانی دیسانەکە کەوتنە بەر بێڕێزی کردنی ناوەندە هەواڵنیرییەکانی سەربە حکوومەتی ئیسلامی.
ماوەیەک لەمەو پێش کە بەرپرسانی پارێزگای کرماشان، سەردانی “نەسرەدین حیدەری” پێشەوای یارسانەکانی رۆژهەڵاتیان لە شاری سەحنە کرد، ماڵپەڕێکی سەر بە رێژیم بەناوی “فرقە نیوز” کە بە یارمەتیی ماڵی و پشتیوانیی ناوەندە ئەمنییەتیەکان بەڕێوەدەچێ، دەستیداوەتە بێرێزی کردنی سەرلە نوێ دەرهەق بە ئایینی کوردانی یارسان. ئەو ماڵپەرە بە بڵاوکردنەوەی بابەتێک لە سەر ئایینی کوردانی یارسان کە ئایینێکی کۆنە و هەڵقوڵاوی ئایینی میترائیسم و زەردەشتە و لە رۆژهەڵات و باشووری کوردستان پیرەوانی خۆی هەیە، ئەوپەرێ بێرێزی بە پێرەوان و رێبەرانی ئەو ئایینە سوکایەتی کردووە و بە ئایینێکی پووچی ناوبردووە و چاوپێکەتن لە گەڵ پێشەوای کوردانی یارسانی بە کارێکی سووک لە قەڵەم داوە.
ئەم ماڵپەرە کە سەربە رێژیمە، باوەڕی کوردانی یارسانی بە لاڕێچوون زانیوە و، لەم بارەوە نووسیویەتی: کە ئایینی کوردانی یارسان “هێڵی سووری رێبەرانی شیعە مەزهەبە”.
جیێ وەبیرهێنانەوەیە، لە سەرەتای هاتنە سەر کاری کۆماری ئیسلامی لە ئێران، کوردانی یارسانی بەشێوەی سیستماتیک کەوتوونەتە بەر بێرێزی و هەموو کات بە جۆرێک سووکایەتیان پێدەکرێ.
شایانی باسە، کوردانی یارسان هەتا واز لە ئایینی خۆیان نەهێنن، لە کاروباری دەوڵەتی رێگەیان پێنادرێ و پتر لە ٣٧ ساڵە لە مەجلیسی شووڕای ئیسلامی ئێران نوێنەریان نیە و لە دەوڵەتی ئەحمەدی نەژاد بەملاوە ئەم گوشار خستن و بێرێزی کردنە سیستماتیکە بە ئایینی کوردانی یارسان زیاتر پەرەی ستاندوەو تاکوو ئێستاش هەر درێژەی هەیە.