شەوی پێنجشەممە لە سەر هەینی رابردوو لە هەڵمەتێکی چاوەڕواننەکراودا هێزە ئەمنییەتییەکانی دەوڵەتی تورکیە سەلاحەدین دەمیرتاش و فیگەن یوکسەکداغ، هاوسەرۆکانی پارتی دێموکراتیکی گەلان(هەدەپە) و نۆ پارلەمانتاری دیکەی ئەو حیزبەیان دەستبەسەر کرد.
دەستبەسەرکردنی نوێنەرانی کوردی پارلمانی تورکیە نیگەرانی و کاردانەوەی جۆراوجۆری لە سەر ئاستی بزووتنەوەی خەڵکی کوردستان، لایەنەکانی تورکیەو دەوڵەتان و کۆمەڵگای نێودەوڵەتی لێ کەوتۆتەوە.
حیزبی دێموکراتی کوردستان هاوکات لە گەڵ مەحکوومکردنی هەڵسووکەوتی توندوتیژو ئەمنییەتیی دەوڵەتی تورکیە بەرانبەر بە پارلمانتارانی کوردو، بە گشتی پرسی کورد لە باکووری کوردستان، دەستبەسەرکردنی نوێنەرانی هەدەپە بە قازانجی بەرەوپێشچوونی پرسی ئاشتەوایی لەم وڵاتە نازانێ.
بێگومان پەکخستنی پرۆسەی ئاشتی لە تورکیە لە لایەن هەر کەس و لایەنێکەوە بێ، لە کۆتایی بە زیانی دەوڵەتی تورکیەو پێکهاتەکانی ئەم وڵاتە تەواو دەبێ.
لە کۆتاییدا هیوادارین دەوڵەتی تورکیە بە ئازادکردنی نوێنەرانی هەدەپەو کارکردن بۆ ئاسایی کردنەوەی بارودۆخەکە، دەرفەتێکی دیکە بۆ دەسپێکردنەوەی پرۆسەی ئاشتی لەم وڵاتەدا بڕەخسێنێ.
حیزبی دێموکراتی کوردستان
دەفتەری سیاسی
١٥ی خەزەڵەوەی ١٣٩٥ی هەتاوی
