پێنەدانی بەوەختی پووڵی چەوەندەر بە جووتیارانی پارێزگای ورمێ ئەوانی تووشی گیروگرفت كردوە.
بەپیچی ڕاپۆرتی موكریان، ئەمساڵیش جووتیارانی چەوەندەركاری پارێزگای ورمێ نەیانتوانی لە كاتی خۆیدا پارەی بەرهەمەكانیان وەربگرن. دەگوترێ نەبوونی بازاڕی فرۆشی بەرهەمەكانی جووتیاری و نەبوونی نەغدینە لەلایەن كارخانەكان هۆکاری سەرەکیی دواکەوتنی قەرزی ئەو جوتیارانە بووە.
ئیسماعیل كەریمزادە، سەرۆكی جیهادی كەشاوەرزیی پارێزگای ورمێ دەڵێ هۆكاری دواكەوتنی پووڵی جووتیاران نەبوونی پارەی نەغدە و ئێمە شەرمەزاری ئەوانین و داوای لێبوردنیان لێدەكەین، بەڵام جوتیاران ئەمە بە بیانووهێنانەوە دەزانن و دەڵێن ئەدی چۆنە چەوەندەرەکانمان بە زەمانەت لێدەکڕن بەڵام دوایە دەڵێن پووڵمان نییە.
سەرۆكی جیهادی كەشاوەرزیی پارێزگای ورمێ دەڵێ ساڵی ڕابردوو بایی ٤٣٠ میلیارد تمەن چەوەندەر لە جوتیارانی ئەو پارێزگایە کڕدراوە، بەڵام كارخانەكانی قەندی ئەم پارێزگایە تا ئێستاش ٦ میلیارد تمەن لە قەرزی مانگی بەفرانباری ساڵی پێشوویان لەسەرە.
جووتیارانی پارێزگای ورمێ لەگەڵ دواکەوتنی پێدانی پووڵی بەرهەمەکانیان کێشەیەکی دیکەشیان هەیە و ئەویش ئەوەیە كە چاندنی زۆری چەوەندەریان لێ قەدەغە كردوون تا لە ڕێگەی پاشەكەوتی ئاوی جووتیاران لە ساڵەكانی دواتردا دەوڵەت ڕەوتی ژیانەوەی گۆلی ورمێ زیاتر پێش بخا.
