لە دوو حەوتووی ڕابردوودا ئەندامان، لایەنگران و دڵسۆزانی حیزبی دیموکراتی کوردستان لە شارو ناوچە جیاوازەکانی ڕۆژهەڵاتی کوردستان، جارێکی دیکە وەفاداریی خۆیان بە ڕێبازو ئامانجەکانی ڕێبەرانی شەهیدی خەباتی ڕزگاریخوازی لە ڕۆژهەڵاتی کوردستان، نیشان دایەوە. جارێکی دیکە ئەو ڕقو بێزارییەیان بە ڕێژیمی کۆماری ئیسلامیی ئێران نیشان دایەوە کە لە دەروونو باوەڕی خەڵکی ڕۆژهەڵاتی کوردستان بەرامبەر بەو ڕێژیمە پەنگی خواردووەتەوە.
لە بەرەبەری ٢٤ ساڵەی تیرۆری د.سادق شەرەفکەندیو هاوڕێیانیدا، ڕۆژهەڵاتی کوردستان هەر لە شارو ناوچەکانی ئیلامەوە تا سەرووترین ناوچەکانی باکووری ڕۆژهەڵات، بۆ جارێکی دیکە بوونەوە بە گۆڕەپانی پەیمان نوێکردنەوەی هۆگرانی حیزبی دیموکڕاتو ڕێگا و ئامانجەکانی ئەو ڕێبەرە شەهیدە. ئەندامان و لایەنگرانی حیزبی دیموکرات و دڵسۆزانی بزووتنەوەی ئازادیخوازی لە کوردستان، بە کاری تەبلیغیی بەرین، شەقامو بازارو کۆڵان وڕێگا و بان و تەنانەت دارودیواری بنکە و دامەزراوە سەرکوتکەرەکانی ڕێژیمی تیرۆریست و تیرۆیستپەروەری ئێرانیشیان بە تراکت و دروشم و وتەی ڕێبەرانی شەهیدی خۆیان ڕازاندەوە. ئەمجارەش سەلماندیان کە خوێنی شەڕەفکەندی و ڕێبەرانی شەهیدی دیکەیان بە فیڕۆ ناچیو ڕێگا و ئامانجەکانیان بە شەهید بوونیان، کوێر نابێتەوە.
هاوکات لە گەڵ ئەم چالاکییە بەرینانە، لە زۆر شار و ناوچەی ڕۆژهەڵاتی کوردستانەوە، بە بۆنەی شەهیدبوونی هاوڕێیان ئازاد ئاڵی و ئەمیر نستانی، پەیام و بروسکەی هاودەردی و سەرەخۆشی و پشتیوانی بە تەلەفۆن، و لە ڕێگای تۆڕە کۆمەڵایەتییەکانیەوە بە کۆمیسیۆنی تەشکیلاتی حیزب گەیشتوون. کۆمیسیۆنی تەشکیلات، بە بۆنەی کارو چالاکیی ئەندامان و دڵسۆزانی حیزب، هەر وەها بە بۆنەی هاودەردی و هاوپێوەندیی هۆگرانی دیموکرات لە گەڵ حیزبمان بە دوای شەهید بوونی ئەم دوو تێکۆشەرە بە نرخەدا، سوپاسی گەرمی خۆی پێشکەشیان دەکا و بە چاوی ڕێز و پێزانینەوە، دەڕوانێتە تێکۆشان و هەڵوێستی بوێرانە و نیشتمانپەروەرانەیان. بە دڵنیاییەوە ئەم هاوپیوەندی و پشتیوانییەتان ئێمە لە درێژەدانی ئەرکەکانمان شێلگیرتر دەکا.
دەستتان خۆش و هیممەتتان هەر وا بەرز هۆگران ودرێژەدەرانی ڕێگاو ئامانجەکانی د.شەرەفکەندی و هەموو شەهیدانی سەربەرزی گەلی کورد.
حیزبی دیموکراتی کوردستان
کۆمیسیۆنی تەشکیلات
٢٨ی خەرمانانی ١٣٩٥
١٨ی سێپتامبری٢٠١٦
