پاش تێپەڕبوونی ٦ مانگ لە ساڵی ٩٥، هێشتا بوودجەی دیاریکراو بۆ پارێزگای سنە کە حسێبی پارێزگا نەکراوە.
مەنسوور مرادی، سەرۆكی كۆڕی نوێنەرانی پارێزگای سنە بە هەواڵدەریی حکومەتیی تەسنیمی ڕاگەیاند كە ٦ مانگ لە ساڵی ٩٥ تێپەڕێوە کەچی هێشتا بوودجەی پارێزگای سنە نەگەیوەتە جێ و، هیچ پڕۆژەیەكی ئاوەدانكردنەوە بای قڕانێكی كار لەسەر نەكراوە.
مرادی وێڕای شیکردنەوەی بارودۆخی پارێزگای سنە لە ڕووی پێڕاگەیشتن بە پڕۆژەکان گوتی بارودۆخی ئەم پارێزگایە لە چاو پارێزگاكانی دیكەی ئێران زۆر نالەبارە، بۆ نموونە پارێزگای ئیسفەهان سەدی ٧٠ خەڵكەكەی لە ژێر چاودێریی بیمەی كۆمەڵایەتی دان كە ئەم ڕێژەیە لە پارێزگای سنە لە سەدی ٤٠ کەمترە، ئەوە جیا لە پڕۆژەکانی ئاوەدانکردنەوە و ژێرخانی ئابووری.
ناوبراو وێڕای دەربڕینی شەرمەزاریی خۆی لە ژمارەی زۆری بێكاریی خەڵكی پارێزگای سنە گوتی تەنیا دڵخۆشیی ئێمە دوو بازاڕچەی سنووریی پارێزگایە و، ئەگەر دوو بازاڕچەی سنوورەكانی مەریوان و سەوڵاوا نەدەبوون، قەیرانی بێكاری زیاتر لە ئێستا تەنگی بەخەڵك هەڵدەچنی و بارودۆخەكە لەوەی هەیە خراپتر دەبوو.
نوێنەری خەڵكی مەریوان و سەوڵاوا لە مەجلیس وێڕای ڕەخنەگرتن لە سیاسەتی خۆبواردنی دەوڵەت لە سەرمایەدانان لەم پارێزگایە گوتی ئەگەر دەوڵەت سەرمایەگوزاری لە سنە نەدا، كەرتی تایبەتیش هەست بە ئەمنیەت ناكا و خۆی لێدەپارێزێ.
شایانی باسە پارێزگای سنە لە ٢٥ ساڵی ڕابردوودا هەمیشە یەکێک لەو چەند پارێزگایەی ئێران بووە کە زۆرترین ئاماری بێکارییان تێدا تۆمار کراوە.
