چەند ڕۆژ پاش ڕاگەیاندنی ئاگربەس لە سووریە كە بەدوای ڕێكەوتنی ئامریكا و ڕووسیەدا بوو، ڕێكخراوی نەتەوە یەكگرتووەكان سەبارەت بە وەدواكەوتن و گەیاندنی یارمەتیی مرۆڤدۆستانە بۆ خەڵكی مەدەنی لە شاری حەلەب بەداخبوونی خۆی ڕاگەیاند.
كاربەدەستێكی دەوڵەتی توركیە ڕۆژی چوارشەممە ڕایگەیاند كە چاوەڕوانیی چرا سەوزێک دەکەن خۆیان بگەیەنینە پارێزگای حەلەب کە دووهەمین گەورە شاری سووریەیە.
کارناسان دەڵێن وێدەچێ بەهۆی كێشەی نێوان لایەنەكانی شەڕ لەسەر ئاگربەس گەیاندنی یارمەتیی مرۆڤدۆستانە بۆ ئەم ناوچەیە دوا بکەوێ. دەیوید ئەسوانسۆن، وتەبێژی دەفتەری هاوئاهەنگیی كاروباری مرۆڤدۆستانەی ڕێكخراوی نەتەوە یەكگرتووەكان ڕایگەیاند كە كاتی دابەشكردنی یارمەتییە مرۆییەكان لە نێو خەڵكی حەلەب لەوەی چاوەڕوان دەكرا درێژتر بۆتەوە.
ڕێكەوتن بۆ ئاگربەس لە سووریە بە مەبەستی کەمکردنەوەی توندوتیژی لەم وڵاتە، پاش وتووێژی نێوان ئامریكا و ڕووسیە هاتۆتەدی و ئەم ڕێكەوتنە لە شەوی دووشەممەوە جێبەجێ كراوە، بەم حاڵەش، مەسەلەی دابەشكردنی یارمەتییە مرۆییەكان لە نێو خەڵكی مەدەنیدا لە ناوچە شەڕلێداروانەدا چارەسەر نەكراوە و لایەنەكانی شەڕ كێشەیان هەیە.
ڕێكخراوی نەتەوە یەكگرتووەكان مەزندەی ئەوەی كردوە كە زیاتر لە ٥٠٠ هەزار كەس لە ناوچە گەمارۆدراوەكانی سووریە چاوەڕوانیی یارمەتیی مرۆڤدۆستانەن.
