كۆبوونەوەی نهێنیی بەسیجی ورمێ بە بەشداریی بەخشداری سیلوانا لە پێوەندی لەگەڵ چۆنییەتی بەرەنگاربوونە لەگەڵ هێزی پێشمەرگە گیرا.
بەپێی ڕاپۆرتی ناوەندی دێموكراسی و مافی مرۆڤ لە كوردستان، لە ماوەی چەند ڕۆژی ڕابردوودا دووهەمین كۆبوونەوەی نهێنیی فەرماندەكانی بەسیج لە ناوچە سنوورییەكانی ورمێ بە بەشداریی ڕێباز میرزایی، بەخشداری سیلوانا لەپێوەندی لەگەڵ چۆنیەتیی بەرەنگاربوونەوە لەگەڵ هێزی پێشمەرگە بەڕێوەچووە.
ئەم كۆبوونەوەیە لە پایەگای بەسیجی گوندی دزەی مەڕگەوەڕی ورمێ بەڕێوەچووە و لەم كۆبوونەوەیەدا سەرهەنگی پاسدار عەلی حەجازی فەرد، فەرماندەی ناحیەی موقاومەتی بەسیجی سپای ورمێ ڕایگەیاندوە تا ئەو جێیەی دەكرێ، دەبێ لە ئاشكراكردنی ئاماری ورد و دەقیقی كوژراوانی سپا و بەسیج خۆ بپارێزن و بۆ پاراستنی بایەخەكانی شۆرشی ئیسلامی، تەنگ بە حیزبە كوردییەكان هەڵچنن.
سەرچاوەیەكی باوەڕ پێكراو لەم كۆبوونەوەیەدا كە پێویست ناكا ناوی ئاشكرا بكرێ گوتی: بڕیار دراوە بەشێك لە زەوییەكانی بازاڕی حەوتووانەی دەزەی مەرگەوەڕ بە بەسیجییەكان بدرێ و قەرارە بیكەنە ئەنباری تەقەمەنی. هەروەها کۆبوونەوەکە ڕێباز میرزایی بەخشداری سیلوانا یئەركدار كردوە كە بۆ وەرگرتنی ڕەزایەتنامە لە دێهیاری دزەی مەڕگەوەڕ، كۆبوونەوەیەك بۆ پیاو ماقوڵان، ڕدێن سپی و شوورای ئەم گوندە پێك بێنێ .
حەجازی فەرد لەم كۆبوونەوەیەدا پێداگریی لەسەر ئەمە كردەوە كە ئەگەر هێزی پێشمەرگەی حیزبە كوردییەكان لە ناوچە كوردنشینەكان عەمەلیاتێک بکەن، دەبێ لەپێش هەموو شتێكدا ئینترنێتی ئەو ناوچەیە هەڵبڕن، یان بە شێوەیەك فیلتێر بكرێ تا هەواڵەكان بڵاو نەبنەوە. موخابراتی گوندی دەزەی مەرگەوەڕ بە هاوئاهەنگی لەگەڵ ناحیەی موقاومەتی بەسیجی ورمێ، یەكی دیكە لە بەشەكانی پیلان دژی هەر چەشنە جووڵەیەكی هێزی پێشمەرگە دەبێ.
شایانی باسە لە دوو ساڵی ڕابردوودا پێشمەرگەكانی دوو لایەنی حیزبی دێموكرات لە ناوچە سنوورییەكان جێگیربوون و هێندێك چالاكییان لە نێوخۆی كوردستاندا بووە و لە تێكهەڵچوونەكانی نێوان پێشمەرگە و سپای پاسداران و بەسیج لە ماوەی چەند مانگی ڕابردوودا لە ناوچە و شارەكانی پیرانشار، ورمێ، شنۆ، مەریوان، سەقز، سەوڵاوا، سنە، بۆكان، مەهاباد، بانە، مەریوان، كرماشان و ڕوانسەر بە دەیان كەس لە ئەندامانی سپای پاسداران و بەسیج كوژراون.