دوژمن سروشتــــی ناگۆڕێ
هەمان دێوی دڵچڵــــــــــکنە
من و تۆ دووین و دوو بـــڕیار
ئەو بێ سێ و دوو دوژمنـــە
***
نەرمی، سازان، ئاشتیخوازی
نیە دە قامووســـــــــی ئەو دا
دەرووی ڕوون کوا دەکرێتەوە
بە سەر دڵی نیوەشـــــــــەو دا
***
بەڵام ورەم هەر وا بەرزە و
بە دوژمنی خوێنخۆر دەڵـــێم
سەد هێندەی دیــش دڕندە بی
مەحاڵە لە بەرت هــــەڵــــــێم
************
دۆخ هەرچەندە تەنگەبەر بێ
هەنگاو دەنێم، ناکشــــێمەوە
وەکوو گوڵ دوای پەڕپەڕبوونێ
هەموو ساڵێ دەڕوێمـــــــەوە
***
بڕوانن دەشتـــــــی ئەو زێدە
بە سوورەگوڵ داپۆشـــــراوە
بە چاوی خۆم سەد جارم دی
گوڵ پێخوست بوو و هەر ڕواوە
***
ئەو کاروانەی بەڕێــــــوەیە
ئاخری دەگاتە سەرمەنزڵ
مرادی ڕێبـــواری ماندوو
ڕۆژێکی هەر دەبێ حاسڵ
ــــــــــــــــــــــــــ
ئاشق
٢٠١٦
بەشی یەکەمی شێعرەکەم ئەمڕۆ بە بۆنەی شەهیدبوونی ئازاد و ئەمیر گوتوە و بەشی دووهەم بۆ شەهیدانی پێشووتری ئەمساڵ گوتراوە و لە سەر ئەم دیوارەش دانراوە. ئێستا هەردووک بەشم بە یەکەوە داناوە.
