لە ماوەی چەند ڕۆژی رابردوودا چەند كۆبوونەوەی ناڕەزایەتیدەربڕین لە شارەكانی ڕۆژهەڵاتی كوردستان بەڕێوە چوون.
ڕۆژی یەكشەممە ١٤ی خەرمانان گرووپێك لە كرێكارانی گرێبەستیی شیركەتی دابەشكردنی بەرقی ئیلام بە نیشانەی ناڕەزایەتی دەربڕین لە هەمبەر وەرنەگرتنی مووچەی و زیادەكاری دواكەوتووی ٤ مانگی ڕابردوویان لە شوێنی ئەم ئیدارەیە لە بڵواری مودەرێس كۆبوونەوە و داوای ماف و هەقدەستەكانیان کرد.
هەر هەمان ڕۆژ كۆمەڵێك لە داواكارانی مەسكەنی مێهر كە قەراربوو وامی نیشتەجێبوون و مەسكەنیان بدرێتێ، لە بینادی شەهید كە بەشێكیان سەربە بەم ئیدارەیەن كۆبوونەوە و خوازیاری وەرگرتنی یەكەكانی نیشتەجێبوون و وامی خانووبەرە بوون.
لە لایەكی دیكەش گرووپێك لە كارمەندانی ئیدارەی تەعاونیی كرماشان بەهۆی وەرنەگرتنی مووچەی ٤ مانگ لەبەردەم ئەم ئیدارەیە لە بڵواری بە ناو مستەفا ئیمامی كۆبوونەوە و ناڕەزایەتییان دەربڕی.
هەروەها گرووپێك لە كارمەندانی نەخۆشخانەی “خومەینی” لە ئیلام بە هۆی وەرنەگرتنی كارانەی یەك ساڵ و ٥ مانگ زیادەكاری لە شوێنی ئیداریی ئەم نەخۆشخانەیە لە شەقامی حەیدەری كۆبوونەوە و داوای مووچەی دواكەوتوویان کرد.
لە سنەش هێندێك كەس لە داواكارانی مەسكەنی مێهر كە نزیك بە ٤ ساڵە قەولی پێدانی خانوویان پێدراوە، بە هۆی ناڕوونی چارەنووسیان لەبەردەم پارێزگاری ئەم شارە كۆبوونەوە و ناڕەزایەتییان دەربڕی.
گرووپێكی دیكە لە كرێكارانی گرێبەستیی شیركەتی دابەشكردنی برق لە كرماشان، بە هۆی وەرنەگرتنی مووچەی دوو مانگیان لەبەردەم ئەم ئیدارەیە لە بڵواری بەهێشتی كۆبوونەوە و نارەزایەتییان بە دواکەوتنی مووچەکانیان دەربڕی.
هەر لەم حەوتوویەدا كۆمەڵێك لە مامۆستایانی زانكۆی ئازادی كەنگاوەر كە ماوەی ٣ مانگە مووچەیان وەرنەگرتووە، لەم زانكۆیە لە شەقامی كارخانەی كەنگاوەر كۆبوونەوە و داوای مووچە دواكەوتووەكانی خۆیان دەكرد.