جوتیارانی کرماشان زیاتر لە دوو مانگە گەنمەکانیان داوەتە دەوڵەت، بەڵام هێشتا زیاتر لە ٧٥٦ میلیارد تمەنیان قەزر لە سەرە و پووڵەکانیان نەدراون.
ئیدارەی جیهادی کەشاوەرزیی کرماشان دەڵێ تا ئێستا ٧٤٠ هەزار تۆن گەنمی جوتیارانی کرماشانیان بە زەمانەت کڕیوە، بەڵام هێشتا زیاتر لە سەدی ٦٥ی پووڵی خەڵکەکەیان لەلایە و نەیانتوانیوە بیدەن.
حەمید بەساتی، سەرپەرستی شیرکەتی دانەوێڵە و بازرگانیی پارێزگای کرماشان دەڵێ تا ئێستا بایی زیاتر لە هەزار میلیارد تمەنیان گەنم لە وەزیڕەکانی کرماشان کڕیوە بەڵام تەنیا ٣٧٠ میلیارد تمەنیان پێداون.
ئەو پێی وایە کە کێشەی دواکەوتنی پووڵی گەنمی وەرزێڕەکانی کرماشان هەر تایبەت بەو پارێزگایە نییە و لە سەرجەم پارێزگاکانی وڵات دەوڵەت زیاتر لە ٧ هەزار میلیارد تمەنی پووڵی جوتیاران لەسەرە و تا ئێستا تەنیا توانیویەتی یەک هەزار میلیارد تمەنی لەسەر خۆی سووک بکا.
شایانی باسە دواکەوتنی پووڵی گەنمی وەرزێڕان دوای دوو مانگ لە حاڵێک دایە کە پێشتر کاربەدەستانی دەوڵەت وادەی ئەوەیان دابوو کە لە ماوەی حەوتویەکدا پووڵی گەنمی خەڵکەکە دەدەن و ئەوان پێویست نییە بەرهەمەکانیان بەرنە باسکۆڵ و بیدەنە دەڵاڵەکان.