ئەندامێکی کۆڕی نوێنەرانی کرماشان دەڵێ ئەمساڵ لە حەوتووی دەوڵەتدا هیچ پڕۆژەیەکی گرینگ و ئەوتۆ لە پارێزگای کرماشان وەگەڕ نەخرا.
فەرهاد تەجەری لە وتووێژ لەگەڵ هەواڵدەریی حکومەتیی تەسنیم لە کرماشان گوتی ئەو پڕۆژانەی لە حەوتووی دەوڵەتی ئەمساڵدا لە کرماشان تەوابوونیان ڕاگەیەندرا ئەوە نەبوو خەڵک دڵیان پێی خۆش بێ. ئەو دەڵێ نەک پڕۆژەیەکی ئەوتۆ و گرینگ لەمساڵدا تەواو نەکراوە، بەڵکوو هیچ هەوڵێکیش بۆ بەدواداچوون بۆ پڕۆژە نیوەچڵەکانی پارێزگای کرماشان نەدراوە.
نوێنەری قەسری شیرین و گەیلانی ڕۆژاوا و سەرپێڵی زەهاو لە مەجلیس گوتی مەسەلە هەر ئەوە نییە کە لە حەوتووی دەوڵەتدا لە کرماشان پڕۆژەیەکی گرینگ بۆ خەڵک نەکراوە، قسە ئەوەیە کە لە سەردانەکەی سەرکۆمار حەسەن ڕوحانیش لە مانگی گەلاوێژدا پڕۆژەیەک ڕانەگەیەندرا کە دەردێکی خەڵکی ئەو ناوچەیەی پێ دەرمان ببێ.
تەجەری دەڵێ زۆربەی پڕۆژە نیوەچلەکانی ناوچەی کرماشان پێویستییان بە پێدان و تەرخانکردنی بودجە لەلایەن دەوڵەتەوە هەیە، بەڵام دەوڵەت دەڵێ توانای ماڵێی دابینکردنی بودجەی لەوە زیاتری نییە، بۆیە لە دەوڵەتی ئێستادا نابێ چاوەڕوان بین کارێکی ئەوتۆ بۆ پڕۆژە ئابوورییە نیوەتەواوەکان لە کرماشان بکرێ.
بەرپرسانی کرماشان دەڵێن ١٨٠٠ پڕۆژەی نیوەچڵ لەو پارێزگایە هەیە کە تەواوکردنیان ٢٠ هەزار میلیارد تمەنی دەوێ، ئەوەش لە حالێک دایە کە بودجەی بەشی ئاوەدانکردنەوەی پارێزگای کرماشان لە ساڵی ڕابردوودا تەنیا ٨٠٠ میلیارد تمەن بووە.
چاوەدێرانی سیاسی دەڵێن هەندێ لەو پڕۆژە نیوەچڵانەی پارێزگای کرماشان زیاتر لە ١٠ سالە دەستیان پێکراوە، بەڵام بەهۆی نەبوونی بودجەو پشتگوێخرانیان سەرەڕای تەواوبوونی وادەی پێشوویان تەواو نەکراون.
شایانی باسە پشتگوێخرانی پڕۆژەکانی ئاوەدانکردنەوە لە پارێزگای کرماشان لە حاڵێک دایە کە ئەو پارێزگایە لە ڕووی بێکاری بەردەوام لە ڕیزی یەکەم یان دووهەمی پارێزگاکانی ئێراندا جێ دەگرێ.
