تەقینەوەی مین لە ناوچە جیاجیاكانی كوردستان لە حاڵێكدا بەردەوامە كە هەواڵەكان باس لەوە دەكەن دەوڵەت بۆ جارێكی دیكە ناوچە سنوورییەكانی كوردستان مێنڕێژ دەكاتەوە. تەنانەت هێندێك ناوچە كە بە قسەی كاربەدەستانی ڕێژیم لە مین پاك كراونەتەوە هێشتا مینیان تێدا دەتەقێتەوە و قوربانییان لێ دەکەوێتەوە.
عیسا بازیار، كارناسی بواری هەڵگرتنەوەی مین و یەكێك لە شایەتحاڵانی چاندنی مین لە لایەن سپای پاسداران لە كوردستان بە ماف نیوزی ڕاگەیاند زانیاریی وردمان هەیە كە سپای پاسداران لە ناوچە سنوورییەكانی وەك مەریوان خەریكی مینڕێژكردنە و ئەمە وەك ئامرازێكی نیزامی بەرگریی بەکار دێنن.
ناوبراو لە درێژەدا دەڵێ لە كانی گوێژە هەڵكەوتوو لە نێوان سنووری مەریوان و پێنجوێن لە هەرێمی كوردستان و هەروەها لە دەورووبەری پیرانشار و ناوچە سنوورییەكانی وەك تەمرچین و سەرگردە سپای پاسداران مینیان داناوەتەوە.
ناوبراو گوتی كە كۆماری ئیسلامی ئیدیعا دەكا دانانەوەی مین بە مەبەستی پاراستنی سنوورەكانە، بەڵام كۆماری ئیسلامی لە ترسی دزەكردنی هێزی پێشمەرگەی حیزبەكانی ڕۆژهەڵاتی كوردستان خەریكە سنوورەكان مێنڕێژ دەكا.
ئەم كارناسەی هەڵگرتنەوە و لەکارخستنی مین کە هاوکات چالاكی مافی مرۆڤە دەڵێ، كۆماری ئیسلامیی ئێران، كاری مین هەڵگرتنەوەی بە شێوەیەكی ستاندارد ناباتە پێشێ، ئەوە لە حاڵێکدا زیاتر لە ٤ میلیۆن هێكتار لە ئێران بە مین چێندراوە.
