گیروگرفتی كرێكارانی تەنگی گازی بیجار لە ئیلام و شیركەتی “شیروان كاروەرزان” هەروەها درێژەی هەیە. ئەوان چەند جار لەبەردەم پارێزگاری ئیلام كۆبوونەتەوە، بەڵام کۆبوونەوەکانیان بێ ئامان بووە.
بەپێی ڕاپۆرتی ناوەندی دێموكراسی و مافی مرۆڤی كوردستان، ٢٠٠ كرێكاری پڕۆژەی گەشەی گازی تەنگ بیجار جارێکی دی لە بەردەم پارێزگای ئیلام كۆبوونەتەوە و چاوەڕێی وەڵامی داواكانن. ئەم كرێكارە بێكاركراوانە كە ماوەی ٧ ساڵە لە شیركەتەكانی وەزارەتی نەوتدا كار دەكەن، ئێستا گلەیی ئەوەیان هەیە کە لە هیچ و خۆڕا دەرکراون و هیچ كەسیش پشتیوانیان لێ ناكا.
بەپێی ئەم ڕاپۆرتە بەڕێوەبەری گشتیی ئەم شیركەتە لە هەوڵی ئەوە دایە كە لە پارێزگاكانی دیكەی ئێرانەوە كرێكار دامەزرێنێ ئەمە لە حاڵێك دایە كە زیاتر لە ٢٠٠ كرێكاری شارەزای ئیلامی چەندین ساڵ ڕابردووی كار لەو شیرکەتەیان هەیە و ئێستاش بێكاریان کردوون.
بەپێی ئەو ڕاپۆرتە كرێكاران بۆ بەدواداچوونی گیروگرفتەكانیان تا ئێستا چەند جار داواكارییان بۆ ئیدارەی گشتیی كار و ئوستانداریی ئیلامیش ناردوە بەڵام هەر وەك بۆخۆیان دەڵێن هیچ كەس و لایەنێك پشتیوانییان لێ ناكا.
شایانی باسە مەیدانی گازیی تەنگ بیجار، لە پارێزگای ئیلام و لە ٧٠ كیلۆمیتریی باشووری ڕۆژاوای ئیلام هەڵكەوتووە كە بە گەشە و وەڕێخستنی فازی دووهەمی ئەم گەڵاڵەیە، ڕۆژاوای ئێران لە کێشەی بێ گازی ڕزگاری دەبێ.