بڕی هەناردەی ئامریكا بۆ ئێران لە نیوەی سەرەتای ئەمساڵ لە چاو ساڵی پێشوو نیوە بە نیوە دابەزیوە.
بەپێی زانیاریی وەزارەتی بازرگانیی ئامریكا نێوان مانگی بەفرانبار تا پووشپەڕی ئەمساڵ، ئامریكا بڕی ٧٢ میلیۆن دۆلاری كەلوپەل بۆ ئێران هەناردە كردوە ئەمە لە حاڵێكدایە كە ڕێژەی هەناردەی ئامریكا بۆ ئێران لە ساڵی ڕابردوودا و لە هەمان كاتی دیاریكراودا، ١٤١ میلیۆن دۆلار بووە.
ئامارەکان دەڵێن بڕی گشتیی هەناردەی ئامریكا بۆ ئێران لە ساڵی ٢٠١٥ بڕی ٢٨٢ میلیۆن دۆلار بووە و زۆرترین هەناردەی ئامریكا بۆ ئێران لەمساڵدا بەرهەمە کشتوکاڵییەکان بووە.
سەوزەجات، ماڵات، بەرهەمی ئەلكتریكیی پزیشكی، مادەی خاوی دەرمان، دەرمان و ویتامینە ڕووەکییەکان، مادەی سەرەتایی تاقیگاكان، كەلوپەلی ڕادیۆلۆژی، چاو پزیشكی و كەلوپەلەكانی دیكەی پزیشكی و نەشتەرگەری گرینگترین بەشی هەناردەكانی ئامریكا بۆ ئێران بووە.
داگ جیكوبسن، مافناسێك لە بواری گەمارۆكان لە واشنگتۆن دی سی بە دەنگی ئامریكای ڕاگەیاند، دابەزینی هەناردەی ئامریكا بۆ ئێران جێی سەرسوڕمان نییە. لەبەر ئەوەی ڕاستە گۆڕانكاری بەدوای وتووێژی ناوكیی ئێران و ئامریكادا هاتووە و گەمارۆکان هەڵگیراون، بەڵام ئەوە كاریگەریی لەسەر بەرهەم و شیركەتەكانی ئامریكایی دانەناوە.
