ڕێبەری كۆماری ئیسلامیی ئێران هەر دوو حیزبی دێموکڕات و کۆماریخوازی ئامریكای بە جینایەتکار ناو برد و گوتی، ئێمە ناتوانین بە وتووێژ لەگەڵ ئامریكا ڕێك بكەوین و خاڵی هاوبەشمان هەبێ.
عەلی خامنەیی دەڵێ دەوڵەتی ئامریكا سەلاحییەتی ئەخلاقی بۆ دانیشتن لەگەڵ ئێرانی نییە و لە پێوەندی لەگەڵ بۆچوونی كۆماری ئیسلامی لەبارەی دوو حیزبە سەرەكییەکەی ئەمریگا گوتی ئەوان هەر دووکیان جینایەتکارن و کارەساتی مرۆییان خوڵقاندوە.
ناوبراو حیزبی دێموكرات واتە دەوڵەتی ئێستای ئامریكای بە پێكهێنانی تۆڕەكانی تیرۆریستیی مەترسیدار تاوانبار كرد و گوتی دەوڵەتی ئێستای ئامریكا بە ڕەواڵەت هێرش دەكاتە سەر گرووپێكی تیرۆریستی، بەڵام گڕووپی تێرۆریستیی دیکە پێکدێنێ و ئەوە ماناكەی “حاكمیەتی سیاسەتە بە سەر ئەخلاقدا.
ئەو قسانەی خامنەیی لە کاتێک دایە کە ڕێژیمەکەی خۆی ئێستا تەنیا وڵاتی دنیایە کە بە پاڵپشتی لە تێرۆریزمی دەوڵەتی دەناسرێ و یارمەتیی گڕووپە جینایەتکار و تێرۆریستەکانی دنیا دەدا.
عەلی خامنەیی ڕێبەری كۆماری ئیسلامیی ئێران لە درێژەدا پێداگریی لەسەر ئەوە كردەوە كە ئامریكاییەكان لە جیاتی ئەوەی كە لە وتووێژەكاندا بە ڕێككەوتنێك بگەن داواكارییەكانی خۆیان دەسەپێنن گوتی ئێمە هیچ كات لەگەڵ ئامریكا بە وتووێژ بە هیچ كوێ ناگەین و قەت خاڵی هاوبەشیشمان نابێ.
ناوبراو ڕۆژی ٣ی خەرمانانیش لە چاوپێكەوتن لەگەڵ سەركۆمار و ئەندامانی هەیئەتی دەوڵەتی ئێران، ئامریكای بە “بەدحیسابی و بەد قەولی” لە بەرجام تاوانبار كرد و گوتبووی نابێ باوەڕ بە هیچكام لە دەوڵەتەكانی ئامریكا بكەی و لە هەمبەر بەڵێنییەكانیاندا نەغدی خۆت بە قەرز بدەی.
خامنەیی لە بەشێكی دیكەی قسەكانی چوارشەممەدا گوتبووی فراوانكردنەوەی “توانای بەرگریی و هێرشبردن”ی بە “مافی بێ ئەولا و ئەملای” ئێرانی زانیبوو و گوتبووی دەبێ توانا و هێزی بەرگریی خۆمان بەرز بكەینەوە تا زلهێزە ملهوڕەكان هەست بە ترس و دڵەڕاوكێ بكەن.
