لە درێژەی ڕەوتی دەسبەسەركرانی چالاكانی كورد، پویا حوسێن پەناهی لە تاران لە لایەن هێزەكانی سەربە وەزارەتی ئیتلاعات دەسبەسەر و بۆ شوێنێكی ناڕوون گواستراوەتەوە.
بەپێی ڕاپۆرتی كانوونی بەرگریی لە مافی مرۆڤ ی كوردستان، مەئموورەکانی وەزارەتی ئیتلاعات ڕۆژی دووشەممە پویا حوسێن پەناهییان لە شوێنی كارەكەی لە تاران دەسبەسەر کرد و بۆ شوێنێكی ناڕوونیان گواستۆتەوە.
پویا حوسێن پەناهی لەگەڵ پویا موقەدەم و ئاڕمان حوسێن پەناهی لە ڕێكەوتی ٢٠ ڕەشەممەی ساڵی ڕابردوو لە شاری دێولان لە لایەن هێزە ئەمنیەتییەكان دەسبەسەر كرابوون.
ئەم سێ كەسە كوردە لەگەڵ ئەفشین حوسێن پەناهی بە تۆمەتی پروپاگەندەی دژی ڕێژیم و هەوڵدانی دژی ئەمنیەتی میللی لە ڕێگەی بەڕێوەبردنی ڕێوڕەسمی جێژنی نەورۆز و قسەكردنی دژی ڕێژیم لە شارەدێی قوڕوچیا دادگایی و ئەفشین و پویا حوسێن پەناهی هەركام بە ١ ساڵ زیندان و ئاڕمان حوسێن پەناهی و پویا موقەدەم هەر كام بە ٦ مانگ و یەك ڕۆژ زیندان مەحكوم كران.
پویا حوسێن پەناهی خەڵكی دێولان لە كاتی دەسبەسەركرانیدا بە دانانی بارمتە ئازاد كرابوو و هێشتا ڕوون نەبۆتەوە كە هۆكاری دەسبەسەركرانی و جێبەجێكردنی حوكمی یەك ساڵ زیندانی بووە یان هۆكاری دیكەی لە پشتە.
دەسبەسەركرانی پویا لە دێولان لە حاڵێك دایە كە شاری جوانڕۆ، ڕۆژی شەممەی ئەم حەوتوویە، مەئموورانی وەزارەتی ئیتلاعات كەسێكیان بە ناوی ئایەت میرئەحمەدی دەسبەسەر كردوە.
بەپێی ئاماری كانوونی بەرگریكردن لە مافی مرۆڤ لە كوردستان، لە سەرەتای هاوینەوە تا ئێستا زیاتر لە ٨٠ کەس لە كوردستان لە شارەكانی شنۆ، سنە، مەریوان، مەهاباد، نودشە، سەقز، بۆكان، سەوڵاوا، سەردەشت و دێولان دەسبەسەر و بۆ زیندانەکانی وەزارەتی ئیتلاعات یان ئیتلاعاتی سپای پاسداران گواستراونەتەوە كە بەشێکی زۆریان تا ئێستاش چارەنووسیان ناڕوونە.
