شەڕی زێرنگەریی دەزگای قەزایی و دەوڵەت لەسەر فیشەکانی حقوق بەردەوامە. دەزگای قەزایی دەڵێ دەوڵەت ئامادە نییە بەرەنگاری ئەو کەسانە بێتەوە و حەسەن ڕوحانیش دەڵێ ئەو مەسەلەیە هەموو دەزگاکانی حکومەت دەگرێتەوە، نەک هەر بە تەنیا دەوڵەت.
لە حاڵێكدا وتەبێژی دەزگای قەزایی دوو ڕۆژ لەوەپێش ڕایگەیاندبوو كە دەوڵەت لە پێوەندی لەگەڵ پەروەندەی فیشەكانی مووچە تەنانەت یەک پەروەندەشی بۆ دەزگای قەزایی نەناردوە، محەممەدباقر نۆبەخت، وتەبێژی دەوڵەت لە پرێس كۆنفرانسێكدا گوتی گوێی كۆمەڵگا لەو باسە پڕ بووە، بەڵام وادیارە هێندێك ئەم بابەتە تا هەڵبژاردنەکان تەواو ناكەن و دەیانەوێ هەر لەسەری بڕۆن.
ناوبراو پێداگریی کردوە کە دەوڵەت چیدی خۆی تێكەڵ بەم بابەتانە ناكا و دەزگای قەزاییش بۆ خۆی دەتوانێ چیی پێخۆش بێ بیکا.
پێشتر غوڵامحوسێن موحسێنیی ئیژەیی، وتەبێژی دەزگای قەزایی ڕەخنەی ئەوەی لە دەوڵەت گرتبوو کە نەک هیچ پەروەندەیەک لە بارەی مووچە فێرعەونییەکان نەدراوەتە دەزگای قەزایی، بەڵکوو ڕوونیش نییە چەندە پووڵیان گەڕاندۆتەوە خەزێنە؛ لەولاش نۆبەخت، وتەبێژی دەوڵەتیش لە وەڵامدا دەڵێ وا باشە ئەو باسە ببڕێتەوە، چونکی خامنەییش ڕایسپاردوە کە ئەوەندە وەدووی ئەو بابەتە مەدەن و وازی لێبێنن.
نۆبەخت لە درێژەدا گوتی، دەزگای قەزایی ئەوەندەی دەسەڵات هەیە كە لەم كارانەدا نامێنێتەوە و كاتێك ئەم هەموو پەروەندەیە بۆ خەڵکی دەکاتەوە، مەگەر ئیزن لە ئێمە وەردەگرن؟
قسەكانی وتەبێژی دەوڵەت لە حاڵێكدایە كە حەسەن ڕۆحانی، سەركۆماری ئێران جارێکی دیکە ڕایگەیاند کە مووچە نجومییەکان هەر پێوەندییان بە بەڕێوەبەرانی دەوڵەت نییە و دەزگای قەزایی و مەجلیس و هەموو ناوەندە حکومەتییەکان دەگرێتەوە و کێشەیەکە لە ئاستی وڵاتدا.