سەرۆكی ئەنجومەنی یارمەتیدەرە كۆمەڵایەتییەکانی ئێران دەڵێ خۆكوژیی لە ئێران بە هۆی زۆربوون و زۆر باسکردنی لە ماوەی چەند مانگی ڕابردوودا كۆمەڵگەی زیاتر لە جاران هەستیار كردوە. ئەو دەڵێ لە ئێران هەموو ساڵێ٤ هەزار كەس خۆیان دەكوژن، ئەوە جیا لەوەی خۆكوژیی دیكەش زۆر ڕوو دەدا بەڵام لە میدیاکاندا باس ناکرێ بە بێدەنگی تێدەپەڕن.
سەید حەسەن مووسەوی چەلیك، سەرۆكی ئەنجومەنی یارمەتیدەرە كۆمەڵایەتییەکانی ئێران دەڵێ بێ هیوایی لە هۆکارە سەرەکییەکانی خۆكوژییە و تایبەتمەندییەكانی كۆمەڵگەی ئێمە لەم بوارەدا هیوابەخش نییە.
ئەو دەڵێ لە وڵاتی ئێمە ڕەزامەندیی كۆمەڵایەتی، خۆشی و متمانە لە ئاستێكی نزم دایە کەچی لە بەرامبەردا توندوتیژی لە ئاستێكی یەكجار بەرز دایە. هەروەها لە بواری پێشكەوتن و سەرمایەی كۆمەڵایەتیش لە بارودۆخێكی باشدا نیین. خەمۆكی و تێكچوونە دەروونییەکان لە كۆمەڵگاش نیشانەی ئەوەیە كە ئەم كۆمەڵگایە شاد و هیوادار نییە.
مووسەوی چەلیك هەروەها دەڵێ، لە وڵاتی ئێمە بە هۆی هۆكاری جیاجیا، خۆكوژی لە ماوەی چەند مانگی ڕابردوودا بۆتە بابەتێكی جیددی. لە ئێران لە هەر ١٠٠ هەزار كەس نزیك بە ٥ تا ٧ كەس خۆیان دەكوژن، ئەگەرچی ئەو ئامارەش ناتوانێ ورد و دەقیق بێ، چونکی شوێنێک نییە کە بە وردی ئەو ئامارانە ڕابگەیەنێ.
ئەو وەبیری هێنایەوە كە بارودۆخی خۆكوژیی لە هیچ شوێنێكی جیهان وەك “دەڕە شار”ی ئیلام نییە و دەوڵەت نەیتوانیوە بەر بە پەرەسەندنی خۆكوژییەکان لەم ناوچە و هەموو ناوچەکانی ئێران کە خۆکوژیی زۆریاندا تێدا ڕوو دەدا بگرێ.