ئامریكا وێڕای دانە بەر ڕەخنەی تورکیە سەبارەت بە پەلاماردانی هێزە کوردییەکانی ڕۆژاوای کوردستان دەڵێ ئەوەمان پێ قەبووڵ ناکرێ هاوپەیمانەکانمان لە دژی یەکتر بوەستنەوە.
بێرت مەك گورك، نوێنەری تایبەتی سەركۆماری ئامریكا لە بەرەی هاوپەیمان لە دژی داعش گوتی، لایەنەكانی شەڕ دەبێ كۆتایی بەو دۆخە ێبێنن و هەوڵەکانیان بۆ شەڕ لەگەڵ داعش بخەنە گەڕ.
هێزەكانی نیزامیی توركیە لە ماوەی چەند ڕۆژی ڕابردوودا بە هاتنە نێو خاكی سووریە یارمەتییان بە گرووپە چەکدارەکانی ئەم وڵاتە دا چەند ناوچەیەکی ژێر دەسەڵاتی کوردەکان داگیر بکەن. ئەو هێزە چەکدارانەی پاڵپشتیی تورکیەیان لەگەڵە، لە لایەن ئەرتەشی بەشار ئەسەدیشەوە هاوكاری دەکرێن، ئەمەش لە حاڵێكدایە كە بەرەی دێموکڕاتیک کە لە كورد و عەرەبی ئەو ناوچەیە پێکهاتوون و ئێستا لەلایەن تورکیەوە هێڕشیان کراوەتە سەر؛ پشتگیریی ئەمریکایان هەبوو و لە لایەن هێزە تایبەتییەكانی ئامریكاوە ڕاهێندراون.
لە لایەكی دیكەوە بە دوای شەڕ و پێكدادانەكانی نێوان ئەرتەشی توركیە و هێزە كوردییەكان لە باكووری سووریە، یەكینەكانی پاراستنی گەل سەربە هێزەكانی دێموكراتیكی سووریەیە پێگەی خۆیان لە شاری مەنبجدا بەهێزتر دەكەن.
سەرچاوەیەكی ئەمنیەتیی لەم ناوچەیە بە هەواڵدەریی رۆیتێرزی ڕاگەیاندوە كە هێزە كوردییەكان پێشمەرگە و چەكوچۆڵی زیاتریان بۆ شاری مەنبج ناردوە.
لەولاش ئەحمەد عوسمان، فەرماندەی هێزی ژێر چاودێریی هێزەكانی توركیە هەر بە ڕۆیتێرزی ڕاگەیاندوە كە ئەوان لە هەوڵی ئەوەدان كە دەست بەسەر شاری مەنبجدا بگرن.
توركیە لە هەوڵی ئەوە دایە كە بە عەمەلیاتی نیزامیی “قەڵغانی فورات” لە باكووری سووریە كە لە ڕۆژی چوارشەممەوە دەستی پێكردوە، گرووپی داعش لە سنوورەكانی باشوور بڕەتێنن و هێزە كوردییەکانیش ناچار بكەن لە ڕۆژهەڵاتی فورات بکشێنەوە.
