بەرپرسێكی پلە بەرزی وەزارەتی نەوتی عێراق دەڵێ، ئەگەر وتووێژەكانی بەغدا و هەولێر لەسەر هەناردەی نەوتی كەركووك بێ ئاکام بن، دەوڵەتی ناوەندی لە خاكی ئێرانەوە نەوت هەناردە دەكا.
شیركەتی میللی نەوتی عێراق لە هەوڵی ئەوە دایە كە لە حەوتووی داهاتوودا، بۆ هەناردەی نەوتی وڵاتەكەی لە ڕێگەی توركیەوە، وتووێژەكان لەگەڵ كاربەدەستانی هەرێمی كوردستان دەست پێ بكا.
فەییاز ئەلنما، وەزیری نەوتی عێراق لە وتووێژێكدا لەمبارەیەوە گوتی، ئەگەر وتووێژەكان هیچ ئەنجامێكیان نەبێ لە هەوڵی دۆزینەوەی ڕێگەیەكدا دەبین كە لە ڕێگەی ئێران یان وڵاتانی دراوسێ نەوتی وڵات هەناردە بکەین، لەبەر ئەوەی كە ئێمە پێویستیمان بە پارە هەیە.
عێراق دووهەمین وڵاتی بەرهەمهێنی نەوتی ئۆپێك پاش عەرەبستانە، بەڵام سەدی ٩٥ی بوودجە و خەرجی گشتیی ئەم وڵاتە لە رێگای فرۆشتنی نەوتەوە دابین دەكرێ. ئابووریی عێراقیش بە هۆی دابەزینی نرخی نەوت و شەڕ لەگەڵ داعش لە بارودۆخێكی باشدا نییە.
لەلایەکی دیکەوە هەرێمی كوردستان، ڕۆژانە ٥٠٠ هەزار بۆشكە نەوت لە ڕێگەی توركیەوە هەناردە دەكا. دەوڵەتی ناوەندی نایەوێ كە ئەم ئاستە هەناردەیە بۆ ئێران بنێرێ بەڵام ئیمكانی ئەوە هەیە كە بەرهەمهێنانی نەوت لە دەرووبەری كەركووك تا ئاستی ١٥٠ هەزار بۆشكە لە ڕێگەی ئێرانەوە لە ڕۆژدا هەناردە بکا.
سەفین دزەیی وتەبێژی هەرێمی كوردستان لە مانگی ژوئەن بە ڕۆیتێرزی ڕاگەیاند كە هەرێمی كوردستان ئامادەیە لەم بوارەدا گرێبەست لەگەڵ بەغدا ئیمزا بكا بە مەرجێك كە دەوڵەتی ناوەندی مانگانە یەك میلیارد دۆلاری بداتێ.
هەریمی كوردستان ناردنی نەوتی خۆی بۆ دەوڵەتی ناوەندی ماوەی یەك ساڵە ڕاگرتووە و ئەم بڕیارە كاتێك دەركرا كە دەوڵەتی ناوەندی پارەی مانگانەی هەرێمی كوردستانی بۆ ٤٠٠ میلیۆن دۆلار كەم کردەوە.
