لە درێژەی عەمەلیاتی نیزامی لە باشووری سووریە، ئەرتەشی توركیە بۆ جارێكی دیكە كۆمەڵێك تانكی بۆ قەرقەمیش لە سنووری سووریە نارد و فڕۆكە شەڕكەرەكانی توركیە مۆڵگەی داعش و هەروەها بنك ەو بارەگای هێزە كوردییەكانی رۆژاوای کوردستانیان بۆمباران كردەوە.
هاوكات هەواڵدەریی رۆیتێرز ڕایگەیاند كە هێزەكانی ژێر دەسەڵاتی توركیە لە سووریە لە نزیك شاری جەرابلۆس لەگەڵ هێزە كوردییەكان لێکیان داوەتەوە.
فەرماندەیەكی سووریە بە هەواڵدەریی ڕۆیتێرزی گوت ئەم شەڕ و پێكدادانانە لە دوو ناوچەی “ئەلامارنا” و “یوسف بەیك” لە باشووری جەرابلۆس ڕووی داوە.
سەرچاوەیەكی دیكە لە ئیدارەی خودموختاری كوردەكان لە لێدوانێکدا بۆ هەواڵدەریی فەرانسە ئەم تێكهەڵچوونانە و پێشڕەویی تانكەكانی توركیەیان بۆ ناوچەی ئەلامارنا پشتڕاست كردەوە.
ڕامی عەبدوڕەحمان، سەرۆكی ڕێکخراوی چاودێریی مافی مرۆڤ لە سووریە دەڵێ پێشڕەویی تانكەكانی توركیە لە پارێزگای حەلەب بۆ یەكەم جار شەڕ لەگەڵ هێزە كوردییەكان لەم ناوچەیەی لێکەوتەوە. ناوبراو دەڵێ هێزە عەرەب و توكەمەنە خۆجێییەكانی سووریە لە هەمبەر هێرشی توركیەدا پشتیوانییان لە كوردەكان كردوە.
جێی بیرهێنانەوەیە کە هێزەكانی توركیە لە ڕۆژی چوارشەممەی حەوتووی بەرێ هێرشیان بۆ سەر خاكی سووریە دەست پێكردوە. ئەوان کە بە بیانووی لێدان لە گرووپی تیرۆریستیی داعش هاتوونەتە ئەو شەڕەوە، هاوکات دەیانەوێ پێش بە پێشڕەویی هێزە كوردییەكانی ڕۆژاوا بگرن.
