سەلاحەدین دمیرتاش، هاوسەرۆکی پارتی دێموكراتیكی گەلی توركیە لە دیدار لەگەڵ كەسوكاری قوربانیانی هێرشی خۆكوژیی غازی عینتابدا ڕوو بە دەوڵەتی توركیە گوتی، بۆ دەربازبوون لە شەڕی تیرۆریزم دەبێ هاوكاری یەکتر بین.
سەلاحەدین دمیرتاش ڕوو بە ئەردۆغان گوتی، گوێ بدە ئێمە، دەنگی ئۆپۆزیسیۆن ببیستە، لە دەوڵەتەکەی نێو دەوڵەتەکەت بپرسەوە، دەنا كوشتنەکان بەردەوام دەبێ و هەموو ڕۆژێ دەمانكوژن، با لە تەنیشت یەك بین، لێگەڕێ با ئەو كەسانەی ئەم كوشتارەیان كردوە سزا بدرێن و با پێكەوە بۆ شەڕی ئەم كەسانە بچین.
دەمیرتاش گوتی ئەگەر ئەم وڵاتە هی ئێمەشە، ئەگەر ئێمەش هەقمان بەسەر هەموو خاكی توركیەوە هەیە كەواتە وەرە با پێكەوە وڵاتەکەمان لەسەر بنەمای ئاشتی و ئارامی دروست بكەینەوە.
لە لایەكی دیكە یەكیەتیی كۆمەڵكەی كوردستان كە لە هەموو ڕێکخراوە کوردییەکانی باکووری کوردستان و یەک لەوان پ ك ك پێکهاتووە، لە بەیاننامەیەدا بۆ گەڕانەوە بۆ سەر مێزی وتووێژەكان لەگەڵ توركیە ئامادەیی خۆیان دەربڕیوە.
جێی بیرهێنانەوەیە کە شەوی شەممە، لە شاییەكدا لە شاری غازی عینتاب لە باكووری كوردستان لاوێكی خۆكوژ خۆی تەقاندەوە و لە ئاكامدا بە دەیان كەس كوژران و بریندار بوون کە هەموویان خەڵکی مەدەنی و زۆربەیان ژن و منداڵ بوون.
