لە حاڵێكدا لە عێراق هێزەکانی پێشمەرگە و دەوڵەتی خۆیان بۆ ئەستاندنەوەی شاری موسڵ لە دەستی داعش ڕێک دەخەن، ڕێكخراوی نەتەوەیەكگرتووەكان ڕایگەیاندوە كە بە نزیكبوونەوەی عەمەلیاتی گرتنەوەی شاری موسڵ، خۆیان بۆ شەپۆلێكی دیكەی پەنابەران ئامادە دەكەن.
ڕێكخراوی نەتەوەیەكگرتووەكان دەڵێ بە ئەگەری زۆر لەگەڵ دەسپێكی شەڕی گرتنەوەی موسڵدا بە سەدان هەزار كەس ئەم شارە بەجێ بێڵن.
زیاتر لە مانگێكە ئەرتەشی عێراق ڕایگەیاندوە بنکەی ئاسمانیی گەیارەی گرتۆتەوە و لەوێوە هەوڵدان بۆ گرتنەوەی ئەو شارە درێژەی بووە.
بەپێی ڕاپۆرتەكان، نزیك بە ١٥ هەزار كەس لە گەیارە گرفتار بوون و لە ترسی داعش تا ئێستاش نەیانتوانیوە لەم شارە خۆیان دەرباز بكەن. بەڵام هێرش كردنەسەر موسڵ لایەنی جۆراوجۆری دیكەی لێدەكەوێتەوە و شیمانەی ئەمە دەكرێ كە نزیك بە ١ میلیۆن كەس تووشی ئاوارەیی و كارەسات ببنەوە.
بەپێی هەڵسەنگاندنەكانی كۆمیساریای باڵای پەنابەران، بە دەسپێكی هێرشكردنە سەر شاری موسڵ نزیك بە ٤٠٠ هەزار كەس بەرەو باشوور، ٢٥٠ هەزار كەس بەرەو ڕۆژهەڵات و١٠٠ هەزار كەسی دیكەش بەرەو باكووری ڕۆژئاوا، یانی بەرەو سنوورەكانی سووریە دەڕۆن.
کۆمیساریای باڵای پەنابەرانی سەر بە نەتەوە یەکگرتووەکان دەڵێ لە سەرەتای ساڵی٢٠١٤وە تا ئێستا زیاتر لە ٣ میلیۆن عێراقی بە هۆی شەڕی داعشەوە ئاوارە بوون و وڵاتەكەی خۆیان جێهێشتووە.
ئەو رێکخراوەیە دەڵێ ئێمە هەرچی لە دەستماندا بێ بۆ ئەم خەڵك دەیكەین، بەڵام پێویستیمان بە ئیمكانات و بوودجەی زیاتر هەیە.
