شەڕ و تێكهەڵچوونی ئەم چەند ڕۆژەی نێوان هێزە كوردییەكان و هێزەكانی دەوڵەتی سووریە پێی لە قۆناغێكی نوێ ناوە.
یەکینەکانی پاراستنی گەل ڕۆژی دووشەممە ١ی خەرمانان لە هێرشێكی بەربڵاوی دیکەیان لە دژی هێزەكانی بەشار ئەسەد لە شاری حەسەكە دەست پێكرد تا ئەو ناوچانەش كە لە بەر دەستی هێزەکانی بەشار ئەسەد دان لە چنگیان دەربێنن.
ئەو شەڕەی لە ماوەی یەك حەوتووی ڕابردوودا لە حەسەكە لە نێوان هێزە كوردییەكان و هێزەكانی دەوڵەت بووە، لە ماوەی ئەم ٥ ساڵەدا شەڕی وەها نەكراوە.
یەكینەكانی پاراستنی گەل، ناوچەیەكی بەربڵاو لە ڕۆژاوای کوردستان و باكووری سووریەیان لەبەر دەست دایە و وەک ناوچەیەکی خودموختار بەڕێوەی دەبەن. لە لایەكی دیكە لە ماوەی چەند ڕۆژی ڕابردوودا هەواڵی جۆراوجۆر لە پێوەندی لەگەڵ تێكهەڵچوونی فڕۆكەكانی بەرەی هاوپەیمان و هێزەكانی ئاسمانیی سووریە لە حەسەكە ڕاگەیەندراوە.
جێف دیویس، وتەبێژی وەزارەتی بەرگریی ئامریكا دەڵێ فڕۆكە شەڕكەرەكانی بەرەی هاوپەیمان لە عەمەلیاتی نائاساییدا بۆ ڕێگری لە جموجۆڵ و هێرشەکانی فڕۆكەكانی سووریە لە شاری حەسەكە بە ئاسمانی حەسەکەدا دەسووڕێنەوە
ئەو بە ئاشکرا دەڵێ مەبەست لەم عەمەلیاتە پشتیوانی لە هێزە كوردییەكانی نێو شاری حەسەكە لە بەرامبەر هێرشی ئاسمانیی دەوڵەتی سووریە بووە.
