وەزیری ئیرشاد ڕایگەیاند كە ئەحمەد عێلمولهودا، نوێنەری عەلی خامنەیی لە خۆراسان دژایەتیی بەڕێوەچوونی كۆنسێرتی موسیقی لە مەشهەدی كردوە و هەر بۆیە ئەم وەزارەتخانەیە بەڕێوەچوونی کۆنسێرت لەم شارە هەڵدەوەشێنێتەوە.
عەلی جەننەتی گوتی گرتنی كۆنسێرت لە شاری مەشهەد بە دوو هۆكار دروست نییە یەكیان لەبەر بوونی قەبری ئیمام ڕەزا و دووهەمیش ئەوە کە نوێنەری عەلی خامنەیی ڕەزامەندیی لەسەر نییە و هەر بۆیە وەزارەتی ئیرشادیش بڕیاری داوە گرتنی کۆنسێرت لەو شارە كۆتایی پێ بێ.
كاربەدەستانی وەزارەتی ئیرشاد لە حاڵێكدا پێشتر چەند جار ڕایانگەیاندبوو كە هیچ كەس جگە لە وەزارەتی ئیرشاد ناتوانێ لە بڕیار لەسەر كۆنسێرتەكان بدا، بەڵام وێدەچێ لە كێبڕكێی نێوان ئیرشاد و وەزارەتی نێوخۆ لەگەڵ دەزگای قەزایی، هێزی ئینتزامی و هێزە توندڕەوەكان بە ڕێبەریی ئەحمەد عێلمولهودا، ئەوە وەزارەتی ئیرشادە کە لە شاری مەشهەد دۆڕاندوویەتی.
شایانی باسە كە هێزی ئینتزامی و دەزگای قەزایی لە مەشهەد چەند مانگە ئیزن بە بەڕێوەچوونی كۆنسێرتەكان لەو پارێزگایە نادەن و یەك لە دوای یەك كۆنسێرتەكانی كەیهان كەڵهور و شەهرام نازری و كۆمەڵێك كۆنسێرتی دیكەشیان هەڵوەشاندۆتەوە، ئەمە لە حاڵێكدایە كە ئەم كۆنسێرتانە پیشتر لە وەزارەتی ئیرشاد ئیزنیان بۆ وەرگیرابوو.
