سەركەوتنی كوردەكان لە مەنبەج و دەركردنی داعش لەم شارە ئەوانی هەنگاوێك بۆ گەیشتن بە دێموكراسی و پێكهێنانی دەوڵەت نزیكتر كردەوە، بەڵام ئەمە بۆ توركیە زۆر ناخۆشە.
مەولوود چاووش ئۆغلوو، وەزیری دەرەوەی توركیە لەم پێوەندییەدا دەڵێ، چاوەڕوانی ئێمە ئەوەیە كە “ی پ گ” دووبارە بۆ پشت ناوچەی ڕۆژهەڵاتی فورات بگەڕێتەوە. ڕووباری فورات وەک هێڵی سووری دەوڵەتی توركیە باسی دەکرێ.
لە كاتی گرتنەوەی كۆبانیش دەوڵەتی توركیە بە نابەدڵی ئامادەبوو دەسەڵاتی كوردەكان لە ناوچەی باكووری سووریە لە ڕۆژهەڵاتی فورات قەبووڵ بكا، بەڵام ئێستا دەڵێ ئێمە مانەوەی كوردەكان لە بەشی ڕۆژاوامان بە هیچ شێوەیەك پێ قەبووڵ ناکرێ.
بەپێی ڕاپۆرتی “ئیشپیگێل ئانلاین” كاتێك بەرنامەی ئازادكرانی شاری مەنبەج دەستی پێكرد، ئامریكا بە توركیەیەی ڕاگەیاند كە ئەم عەمەلیاتە بە بەشداریی كوردەكان دەبێ و توركیە بە دوو مەرج ئەوەی قەبووڵ كرد، یەکەم کە ڕێبەریی ئەم عەمەلیاتە بە عەرەبەكان بێ و هێزەکانی ی پ گ ڕۆڵی پشتیوانی بگێڕن و مەرجی دووهەم ئەوەیە كە پاش ئازادكرانی مەنبەج ئەم شارە بە دەستی شورایەك لە عەرەبەكان بەڕێوەبچێ. بەڵام مەرجەکانی توركیە بڕیان نەکرد.
ئیشپیگێل دەڵێ ئەگەرچی ئەم هێزانەی كە هێرشیان كردەسەر مەنبج، هێزەكانی دێموكراتیكی سووریە، پێكهاتوو لە كورد و عەرەب بوون، بەڵام كوردەكان چەند بەرابەری ئەوان هێزیان هەبوو، لەبەر ئەوەی كە چەندین مانگ بوو ئامریكا لە هەوڵی ئەوە دابوو هێزەكانی عەرەب گەورەتر بكاتەوە بەڵام هەوڵەكانی بێ ئەنجام بوو، مەرجی دووهەمی توركیەش بە هۆی زۆریی هێزی كوردەکان لەم ناوچەیە بەكردەوە جێبەجێ ناكرێ.
