سەرەڕای ئەوەی كاربەدەستانی كۆماری ئیسلامی حاشا لە مووشەك‌بارانی عەڕەبستان لە لایەن حوسییەكانی یەمەن دەکەن، بەڵام ئیرنا، هەواڵدەریی ڕەسمیی ئێران ڕۆژی ڕابردوو ڕایگەیاند كە ئەم مووشەكانەی حوسییەكان لە پارێزگای نجرانی عەرەبستانیان داوە لە جۆری مووشەكی “زەلزاڵی ٣”یە و لە ئێران دروست كراوە.
ئیڕنا لە پێوەندی لەگەڵ ئەم مووشەكە دەڵێ حوسییە شیعەكانی یەمەن مووشەكیكیان لە پارێزگای نجرانی عەرەبستان داوە و جۆرەكەشی زەلزاڵ ٣ی ئێرانە.
ئیرنا لە كاتێكدا ئەم ڕاپۆرتەی بڵاوكردەوە كە تا ئێستاش كاربەدەستانی ڕەسمیی ئێران حاشا لە ناردنی چەكوچۆڵ بۆ حوسییەكانی یەمەن دەكەن، بەڵام هیزی دەریایی ئامریكا لە سەرەتا مانگی مەدی ڕابردوودا، بارێكی چەكی ئێرانی لە دەریای عەرەب ڕاگرت. ئەم بارە بۆ حوسییەكانی یەمەن دەنێردرا.
چاوەدێرانی سیاسی دەڵێن هاوكارییەكانی ئێران بە حوسییەكان بەپێچەوانەی بڕیارنامەی ٢٢١٦ی شورای ئەمنیەت لەبارەی یەمەنە.
