پاشنیوەڕۆی رۆژی هەینی، ٢٢ی گەلاوێژ رێوڕەسمی رۆژی جیهانیی لاوان و کۆتایی خولی پەروەردەی کادری سیاسی و نیزامیی لاوان لە بەرزاییەکانی هەڵگورد بەڕێوەچوو.
ئەم رێوڕەسمە بە بەشداریی ئەندامانی بەڕێوەبەریی یەکیەتیی لاوان و ئەندامانی بەشدار لە خولەکانی کادری سیاسی و پەروەردەی نیزامی بەڕیوەچوو، بە ساتێک بیدەنگی بۆ گیانی پاکی شەهیدانی کوردستان دستی پێکرد و پاشان پێشەوا عەلیپوور، سکرتێڕی ئەو رێکخراوەیە، پەیامی کاک خالید عەزیزی، سکرتێری گشتیی حیزبی دێموکراتی بە نوێنەرایەتی لە لایەن بەڕێزیان پێشکەش کرد.
لە پەیامی سکرتێری گشتیی حیزبدا هاتبوو کە : “لەسەردەمێکدا کە سەردەمی بەجیهانی بوونە، دیاریکرانی رۆژێکی جیهانی بۆ لاوان لەلایەن نەتەوە یەکگرتووەکان بەو واتایە دێ کە لاوان بە تەبیعەتی تەمەنیان چالاکن و هێزێکی کاریگەرن لە گۆڕانکارییەکان و ئەمەش دەسکەوتێکە بۆ چالاکی لە زۆربەی شوێنەکانی دنیا، بەتایبەت لەو شوێنانەی کە لاوان لە مافەکانیان بی بەشن، هەروەها ئەو رۆژە دەرفەتێکە کە بە چالاکی و تێکۆشان پەیامی خەباتی خۆیان بگەیەنن بە کۆمەڵگای نێو دەوڵەتی.”
سکرتێری گشتیی حیزب بە ئاماژە بە بەشداریی لاوان لە جەریانی خەباتی حیزبی دێموکرات ئاماژە بەوە کردوە کە: “میژووی خەباتی نەتەوەی کورد لە رۆژهەڵاتی کوردستان و تێکۆشانی حیزبی دێموکرات بۆ بەدەستهێنانی مافی نەتەوایەتی، غائیب نەبوە لە بەشداریی لاوان، سەردەمی کۆماری کوردستان، پێشەوا قازی محەممەد سەرۆک کۆماری کوردستان و پێشەوای حیزبی دێموکرات بە رێزەوە بیری لە داهاتووی لاوان دەکردەوە و لەسەردەمێکدا کە بیری عەشیرەیی زاڵ بوو و کۆمەڵگا زۆربەی بێ سەواد بوون، پێشەوا قازی زۆر وردبینانە لە فکری پەروەردەکردنی لاوان دابوو بۆ داهاتووی کۆمەڵ و بەڕێوەبردنی کۆمەڵگە. هەر لەسەر ئەو بنەما فکری و فەلسەفییەی پێشەوا قازی یەکیەتیی لاوان کەوتە ناو جەریانی خەباتی حیزبی دێموکرات و هەر ئەمەش بوو بە هۆکار کە چارەنووسی سیاسی نەتەوەی کورد و حیزبی دێموکرات لە رۆژهەڵات یەکیەتیی لاوانیشی گرتەوە،”
دوابەدوای پەیامی سکرتێری گشتیی حیزب، پەیامی هەیئەتی ئیجرایی یەکیەتیی لاوان لەلایەن خاتوو جیهان بێتووشی خوێندرایەوە کە تێیدا هاتبوو: “ئەمساڵ لەکاتێکدا رۆژی جیهانی لاوان بەرز رادەگرین کە رێکخراوەکەمان، یەکیەتیی لاوانی دێموکراتی رۆژهەڵاتی کوردستان خۆی ئامادە کردوە بۆ قۆناغی نوێی تێکۆشان و بە سەرنجدان بە دۆخی ناوچە و رۆژهەڵاتی کوردستان و قەیراناوی بوونی دۆخەکە، دەور و کاریگەرییەکانی لاوان زۆر زیاتر لە جاران بەرچاو دەکەون.
هەر لەو سۆنگەیەوە یەکیەتیی لاوانی دێموکراتی رۆژهەڵاتی کوردستان شێلگیرانەتر لە جاران و بە بەرنامە و پلانی گونجاو لەم وەرزەدا، تێکۆشانی خۆی لە بوارەکانی سیاسی، تەشکیلاتی و پەروەردەی کادر پەرە پێدا و خۆی بۆ قۆناغی نوێی تێکۆشان ئامادە کردوە.”
لە درێژەی ئەو پەیامەدا هاتبوو کە لاوان لە یەکیەتیی لاوان لەسەر دووبنەمای نیشتمانپەروەری و هەروەها ئەخلاقی ئینسانیی و نەتەوەیی پەروەردە دەکرێن هەر بۆیەش ئەندامانی یەکیەتیی لاوان لەسەربنەمای ئاشتی کۆمەڵایەتی و سیاسی و ریزگرتن لە خاک و خەڵکی کوردستان خەبات خۆیان درێژە دەدەن تا گەیشتن بە مافی ئینسانی و نەتەوەییەکانیان.”
لە بڕگەیەکی دیکەی ئەم رێوڕەسمەدا خاتوو سەروین فەتاحی شاعیری لاوی نێو ریزەکانی یەکیەتیی لاوان، شێعرێکی بەو بۆنەیەوە پێشکەش کرد.
لە کۆتایی رێوڕەسمەکەدا مامۆستاکانی وانەی نیزامی چەکی پێشمەرگایەتیان بەسەر ئەندامانی خوولی نیزامیدا دابەش کرد.