لاوانی سەربەرزی رۆژهەڵاتی کوردستان
ئەمساڵ لە کاتێکدا رۆژی جیهانی لاوان بەرز رادەگرین کە رێکخراوەکەتان، یەکیەتیی لاوانی دێموکراتی رۆژهەڵاتی کوردستان خۆی ئامادە کردوە بۆ قۆناغی نوێی تێکۆشان و بە سەرنجدان بە دۆخی ناوچە و رۆژهەڵاتی کوردستان و قەیراناوی بوونی دۆخەکە، دەور و کاریگەرییەکانی لاوان زۆر زیاتر لە جاران بەرچاو دەکەون.
هەر لەو سۆنگەیەوە یەکیەتیی لاوانی دێموکراتی رۆژهەڵاتی کوردستان شێلگیرانەتر لە جاران و بە بەرنامە و پلانی گونجاو لەم وەرزەدا، تێکۆشانی خۆی لە بوارەکانی سیاسی، تەشکیلاتی و پەروەردەی کادر پەرە پێدا و خۆی بۆ قۆناغی نوێی تێکۆشان ئامادە کردوە. لاوان لە یەکیەتیی لاوان لەسەر دوو بنەمای نیشتمانپەروەری و هەروەها ئەخلاقی ئینسانی و نەتەوەیی پەروەردە دەکرێن هەر بۆیەش ئەندامانی یەکیەتیی لاوان لەسەر بنەمای ئاشتیی کۆمەڵایەتی و سیاسی و ریزگرتن لە خاک و خەڵکی کوردستان خەبات خۆیان درێژە دەدەن تا گەیشتن بە مافی ئینسانی و نەتەوەییەکانیان.
لاوانی تێکۆشەری رۆژهەڵات
بە ئاڵوگۆڕ لە سیستمە سیاسییەکانی دەوڵەتی ناوەندی لە تاران و تەجرووبەی دوو سیستمی بەڕێوەبەری لە ئێراندا بەداخەوە بەشی کورد هەر بێ ئیمکاناتی و زیندان و ئەشکەنجە و کوشتووبر بووە و بەتایبەتی لە سەردەمی حکومەتی ئاخوندیدا کە بەشێوەیەکی سیستماتیک مادەی هۆشبەر بەسەر لاواندا بڵاو دەکرێتەوە وبە لەسێدارەدانی لاوانی چالاک لە بوارەکانی سیاسی و مەدەنی دەیانهەوێ لاوان چاوترسێن بکەن، بەڵام لاوانی رۆژهەڵات بە ورەیەکی بەرز و چوونە نێو زانکۆکان و بەردەوامی لە تێکۆشانی مەدەنییانە خەریکی خۆ رێکخستنن و بەدوای مافە نەتەوەییەکانیاندا دەگەڕێن.
لە رۆژی جیهانی لاواندا کە لاوانی وڵاتان ئەو رۆژە دەکەنە دەرفەتێک بۆ بەدەستهێنانی مافە سنفییەکانیان، ئەوە لاوانی نیشتمان داگیرکراوی جیهان دەبێ ئەو رۆژە بکەنە بیانوو بۆ مەترەح کردنی داوا و ویستە نیشتمانی و نەتەوەییەکانیان و لاوانی کوردیش دەتوانن لەم رۆژەدا ئاماژەیەک لە خەبات و تێکۆشانی نەتەوەیی و سنفییان بدەنە کۆڕ و کۆمەڵە جیهانییەکان و داوای پشتگیری نێونەتەوەیی بکەن و ئەمە پێویستی بە هاوکاری و هاوئاهەنگی زیاتری نێوان لاوانی نێوخۆی رۆژهەڵات و رێکخراوەکەی خۆیان واتا یەکیەتیی لاوانی دێموکراتی رۆژهەڵاتی کوردستان هەیە و ئێمەش بەڵێن دەدەین کە وەک رابردوو هەموو پرسگەلی مەدەنی و سیاسیان بگەیەنینە کۆڕ و کۆمەڵە نیونەتەوەییەکان و نوێنەر و داکۆکیاری مافەکانیان بین.
هەر بە بۆنەی رۆژی جیهانی لاوان کە هاوکاتە لەگەڵ تەواو بوونی خوولی کادری سیاسی و هەروەها خولی نیزامی و چەکوچۆڵ بۆ ئەندامانی یەکیەتیی لاوان، جارێکی تر پێبەندبوونمان بە ئەسڵ و پڕەنسیپە نێونەتەوەییەکان دووپات دەکەینەوە و هاوکات بە سەرنجدان بەم ئوسوولە نیونەتهوهییانه کە دەرگای پاراستنی رەوا لەسەر خۆمان دانەخەین و دیفاعی چەکدارانە بە مافی بێئەملاوئەملای نەتەوەکەمان دەزانین و هەر لەو سۆنگەیەوە ئێمەی لاوان ئامادەی بەڕێوەبردنی هەر ئەرکێکی پێشمەرگانەین لە ریزەکانی حیزبی دێموکراتی کوردستاندا.
لە کۆتاییدا بە بۆنەی ١٢ی ئاگۆست رۆژی جیهانی لاوان، پڕ بەدڵ پیرۆزبایی بە لاوانی کورد و رۆژهەڵات دەڵیین و لاوانی کورد دڵنیا دەکەینەوە کە تا گەیشتن بە مافە ئینسانی و نەتەوەییەکانی کورد لە خەبات بەردەوام دەبین.
یەکیەتیی لاوانی دێموکراتی رۆژهەڵاتی کوردستان
هەیئەتی ئیجرایی
١١ی ئاگۆستی ٢٠١٦
