لابرانی یارانەی نەغدیی دەوڵەمەندەكان یەكێك لە ئاستەنگەكانی دەوڵەتی كۆماری ئیسلامیی ئێرانە.
جێگری وەزیری تەعاون، كارو خۆشبژیویی كۆمەڵایەتی دەڵێ دەوڵەت بۆ پێدانی یارانەی نەغدی 6 هەزار میلیارد تمەن كەسریی بوودجەی هەیە.
مەجلیسی شورای ئیسلامی لە قانوونی بوودجەی ئەمساڵ دەوڵەتی ئەركدار كردوە كە لانیكەم یارانەی 30 میلیۆن كەس ببڕێ، بەڵام دەوڵەت دەڵێ یەکجێ ناتوانێ ئەو بڕیارە جێبەجێ بکا.
ئەحمەد میدەری، جێگری وەزیری تەعاون، كارو خۆشبژیویی كۆمەڵایەتی وێڕای ئاماژە بەوەی كەسریی بوودجەی دەوڵەت لە دابینكردنی سەرچاوەی یارانەی نەغدیی نزیك بە 6 هەزار میلیارد تمەنە، گوتی تەنیا پێشنیاری دەوڵەت لابردنی یارانەی چینی پڕداهاتی ئێرانە.
بەقسەی میدەری دەوڵەت لە ماوەی 3 مانگی سەرەتای ئەمساڵ یارانەی نەغدیی 200 هەزار كەسی بڕیوە، بەڵام ئەوەندە هیچ نییە و دەوڵەت هەوڵی بۆ بڕینی یارانەی 4 میلیۆن كەسی پڕداهات دەدا.
بەپێی قانوونی بوودجە دەوڵەت دەبێ یارانەی نەغدیی 16 گرووپی شوغڵی و بنەماڵەگەلێك كە زیاتر لە 3 میلیۆن تمەن داهاتی مانگانەیان هەیە ببڕێ. ئەم قانوونە دەوڵەت ئەركدار دەكا كە یارانەی نەغدیی لانیكەم 30 میلیۆن كەس ببڕێ كە لە دەهەکەکانی 8 تا 10 دان، بەڵام محەممەدباقر نۆبەخت وتەبێژی هەیئەتی دەوڵەت دەڵێ ئەم قانوونەیان بە تەواوی بۆ جێبەجێ ناكرێ.