هێرۆ ئەرجومەند، شاخەوانی كوردی خەڵكی مەهاباد كە بە مەبەستی سەركەوتن لبەسەر كێوی كۆمۆنیسم بە بەرزایی ٧٤٩٥ میتر لە وڵاتی تاجیكستان بەرەو تاران وەڕێ كەوتووە، لە نامەیەكدا كە بۆ نوێنەری شاری مەهابادی ناردووە ،باسی لە كێشەكانی خۆی وەك وەرزشكارێكی ژن كردوە.
ئەم شاخەوانە كوردە نامەكەی خۆی بەم ڕستەیە دەست پێ كردووە كە بۆ جارێكی دیكەش چاو بە فرمێسك و دڵشکاو رێی چیاکان دەگرمە بەر.
هێرۆ ئەرجومەند لەم نامەیەدا نووسیویەتی كە نازانم لە كوێ ڕا دەست پێ بكەم، بەڵام ئەوەش باش دەزانم كە ناكرێ دەرد و مەینەتییەكانم لەم كوتەكاغەزەدا بگونجێنم. ئەگەر باوەڕم بە ئامانجەكانی خۆم نەبوایە بە دڵنیایی بەرگەی ئەم هەمووە فشار و سەختییەم نەدەگرت.
ناوبراو پرسیاری كردوە كە ئایا من وەك وەرزشكارێك، شانازییەكانم تەنیا هەر بۆخۆمن؟ ئەگەر وایە ئەدی لەبەرچی كاربەدەستان بە چەپكە گوڵەوە دێنە پێشوازیم و بە بزەی سەر لێوانەوە وێنەم لەگەڵ دەگرن؟ ئەگەر پێچەوانەی ئەوەشە ئەدی بۆچی نەتەنیا لەم بوارەوە بە هیچ شێوەیەك پشتیوانیم لێ ناكەن، بەڵكوو كۆسپ و لەمەپەریش دەخەنە سەر ڕێگام و نایهێڵن لە چالاكییەكانی خۆم بەردەوام بم؟
ئەم ژنە شاخەوانە كوردە لە درێژەی نامەكەیدا نووسیەیەتی، بۆچی من دەبێ وەك شاخەوانێكی ژن ناچار بم بۆ دابینكردنی خەرجی چالاكییەكانم كە شانازییەكە بۆ نیشتمان و زێدەكەشم، دەستەودامێنی خەڵك بم كە یارمەتیم بۆ كۆ بكەنەوە؟
ئەو لە كۆتایی نامەكەیدا لە نوێنەری شارەكەی خۆی پرسیوە كە ئایا تاوانی مەن ئەوەیە كە وەرزشكارم یان بە تاوانی ژن بوون بەم جۆرە هەڵسوكەوتم لەگەڵ دەكەن؟
