لانی كەم ١١ زیندانی كە ڕۆژی شەممە ٢٦ی پووشپەڕ بە مەبەستی جێبەجێكرانی حوكمی ئێعدام بۆ سلوولە ئینفرادییەكانی زیندانی قزڵحەساری كەرەج گواسترابوونەوە، سەر لە بەیانیی ڕۆژی یەكشەممە ٢٧ی پووشپەڕ ئێعدام كران.
بەپێی ئەم ڕاپۆرتە یەكێك لەم كەسانەی كە ئێعدام كراون ژن بووە و چالاكانی مافەكانی مرۆڤ تەنیا توانیویانە زانیاری لەسەر شوناسی ٢ كەس بە ناوەكانی سەعید سابیری و موسلیم بەهرامی وەدەست بێنن.
دەوترێ ئەم زاندانییانە لەسەر ئەم تاوانانە ئێعدام كراون كە پێوەندییان بە ماددەی هۆشبەرەوە هەیە.
بەیانیی یەكشەممە ٥ كەسی دیكەش لە كەرەج و بیرجەند ئێعدام كراون. بەم جۆرە كە لە ڕاپۆرتەكاندا باس كراوە تەنیا لە ماوەی ڕۆژێكدا لانی كەم ١٦ كەس لە ئێران ئێعدام كراون.
چالاكانی مافەكانی مرۆڤ، ڕێكخراوە جیهانییەكان و تەنانەت كۆمەڵێكیش لە كاربەدەستانی حكوومەتی ئێران، چەندین جار داوایان كردووە كە پێداچوونەوە بۆ قانوونەكانی پێوەندیدار بە كڕین و فرۆشتنی مادە هۆشبەرەكان بكرێ و چی دیكە خەڵك لە سەر ئەم تاوانانە ئێعدام نەكرێن، بەڵام تا ئێستاشی لەگەڵ بێ هیچ ئاڵوگۆڕێك بەسەر ئەم قانوونانەدا نەهاتووە.