نوێنەرانی مەجلیسی ئێران لە كۆبوونەوەی ئاشكرای ڕۆژی یەكشەممە ٢٧ی پووشپەڕدا، گەڵاڵەیەكیان پەسند كرد كە ئەگەر لە لایەن شوورای نیگابانیشەوە پەسند بكرێ، ساڵانە بە لانكەمەوە سەدی 5ی بوودجەی گشتیی ئەم وڵاتە دەخرێتەوە سەر بوودجەی بەرگری و نیزامیی وڵات.
نوێنەرانی مەجلیس دەوڵەتیان ئەركدار كردووە كە لانی ەم سەدی ٥ی سەرچاوەكانی بوودجەی گشتی وەك بەهێز كردنی توانای بەرگری بۆ بوودجەی ساڵانەی ئەم وڵاتە تەرخان بكەن. ئەم نوێنەرانە هەروەها چەند گەڵاڵەیەكیشیان لە بابەت پشتیوانی كردن لە بەسیج پەسند كرد كە بۆ نموونە ئاماژە بە پشتیوانی كردن لە بەسیجی مامۆستاكان، خوێندكاران و فەقێكان لە دامودەزگا جێبەجێكارەكاندا بە مەبەستی بەهێز كردنی ڕێگەكانی ڕووبەڕوو بوونەوە لەگەڵ شەڕی نەرم كراوە.
ئەگەر ئەم گەڵاڵەیە لە لایەن مەجلیسەوە پەسند بكرێ، كارمەندە بەسیجییەكان دەتوانن ١٥ ڕۆژ لە بەسیجدا كار بكەن و مووچەی خۆیان لە شوێنی كارەكەیان وەربگرن.
لەم گەڵاڵەیەدا ڕێگە بە دام و دەزگا جێبەجێكارەكان دراوە كە كۆمەڵێك لە پرۆژەكانی خۆیان وەك دامەزاندن و نۆژەن كردنەوەی مزگەوتەكان، قوتابخانەكان و ناوەندەكانی بێهداشتی ئاواییەكان، نەهێشتنی بیابانەكان، پەرە پێدانی لێڕەوار و گەیاندنی ئاو بۆ گوندەكان ڕادەستی بەسیج بكەن.
نوێنەرەكانی مەجلیس ڕۆژی چوارشەممە ٢٥ی خاكەلێوە، لە ڕەوتی تاوتوێكردنی بووجەی ئەمساڵدا، ئەم گەڵاڵەیان پەسند كردبوو كە هەموو ئەم داهاتانەی كە لە ڕێگەی پێدانی مەعافییەت بە سەربازەكان وەدەست دەكەوێ، تا ئاستی ٣ هەزار و ٥٠٠ میلیارد تمەن، كە دەكاتە ١ میلیارد دۆلاری ئامریكا، بە بوودجەی نیزامیی ئەم وڵاتەوە زیاد بكەن.
پێشتریش نوێنەرەكانی مەجلیس لە گەڵاڵەیەكی دیكەدا بانكی ناوەندییان ئەركدار كردبوو تا ئەم بڕە دراوەی كە لە ڕێگەی شكایەت كردن لەلای سەرچاوە نێودەوڵەتییەكان و وڵاتانی بیانییەوە سەبارەت بە گرێبەستە نیزامییەكانی پێش ئینقلاب و دوای هاتنە سەر كاری كۆماری ئیسلامی هاتوونەتە ئاراوە، تا ئاستی ٥ هەزار میایارد تمەن، بخەن سەر حیسابی بوودجەی نیزامیی ئێرانەوە.