سێ کەس لە ئەندامانی کۆڕی مەشوەرەتیی یارسان بە نیشانەی ناڕەزایەتیدەربڕین بە بەردەوامیی سیاسەتی هەڵاواردنیان لەلایەن دەوڵەتەوە، دەمیان دووری.
سیاوەش حەیاتی، سەید ئەمین عەباسی و نوشاد تاهیری بۆ نارەزایەتیدەربڕین بە سیاسەتی هەڵاواردن و پشتگوێخرانی داوای خەڵکی یارسان لەلای دەوڵەت و پێشێلکردنی مافەکانیان هاوکات لەگەڵ هاتنی ڕوحانی دەمیان دووری و بەمجۆرە ناڕەزایەتیی خۆیان بەو دۆخە دەربڕی.
كۆمەڵەی ڕاوێژكاریی چالاكانی مەدەنیی یارسان پێشتر لە سێهەمین ساڵوەگەڕی خۆسووتاندنی چەند كەس لە ڕێڕەوانی ئایینی یارسان بۆ ناڕەزایەتی دەربڕین بە سیاسەتی هەڵاواردنی کۆماری ئیسلامی، بە ناردنەوەی دووبارەی نامەی ١٤ مانگ لەوەپێشیان بۆ ڕێبەری كۆماری ئیسلامیی ئێران داوایان كردبوو كە سیاسەتی هەڵاواردنو فەرقو جیاوازیدانان کۆتایی پێبێ.
لەم نامەیەدا هاتبوو كە سیاسەتی هەڵاواردن لە سێبەری قانووندا لە دژی خەڵكی یارسان درێژەی هەیە، هەر بۆیەش بوو لە ساڵی ٩٢ سێ لاوای یارسان بۆ دەربڕینی ناڕەزایەتی لەو هەڵاواردنە جەستەی خۆیان ئاگردا، هەتا ببنە دەنگو هاواری خەڵکە مافخوراوو سەرکوت کراوەکەیان.