ماوەی ٤ مانگە “دێهیارەكانی” مەریوان مووچەیان وەرنەگرتووە.
عەبدوڵڵا یوسفی نوێنەری “دێهیارەكانی” بەشی ناوەندیی مەریوان وێڕای ئاماژە بەم بابەتە گوتی: كەمیی ناوەندی فێركاری و بێهداشتی لە ئاواییەكانی مەریوان بە تایبەت لە بەشی ناوەندی و سەرشیو یەكێك لە گرینگترین هۆكارەكانی گەشە نەكردنی ئەم شارەیە.
ناوبراو لە لێدوانێكدا بۆ هەواڵدەریی تەسنیم گوتی: بوونی قوتابخانە ڕووخاو و داڕماوەكان بە پێشینەی زیاتر لە ٥٠ ساڵ لە ئاواییەكانی مەریوان و نەبوونی هاوسەنگی لە نێوان خوێندنگەكان و حەشیمەتی ئەم ئاواییانە، ڕێگرییان لە گەشەكردنی گوندەكانی ئەم ناوچەیە كردووە.
نوێنەری دێهیارەكانی بەشی ناوەندیی مەریوان هەروەها ڕایگەیاند ئانتێن نەدان و لاوازیی تۆڕی موبایل، كەمیی شوێنە وەرزشییەكان، نەبوونی ڕێگەوبانی ستاندارد و جادەی ئیسفاڵت كراو و هەروەها كەمیی ناوەندی بێهداشتی لە بەشە جۆربەجۆرەكانی ئەم شارە، گەشەکردنی ئاواییەكانی تووشی مەترسییەكی زۆر جیددی كردوە.
ناوبراو لە درێژەدا گوتی: پرۆژەی هادی بۆ ئاواییەكان كە بڕیار بوو لە لایەن بنیادی مەسكەنی ئەم شارەوە جێبەجێ بكرێ بە نیوەچڵی ماوەتەوە، تا ئەم جێگەیەی كە دەگوترێ كارەكانی ئەم پرۆژەیە لە زۆربەی ئاواییەكانی دەوروبەر تەنیا سەدی ٣٥ چۆتە پێشێ.
