لە شاری پیرانشار و ئاوایی باغڵووجەی بۆکان بەبۆنەی هاتنەوەی ٢٢ی پووشپەڕ، ساڵڕۆژی شەهیدبوونی دوکتور قاسملوو و عەبدوڵڵا قادریئازەر چالاکیی تەبلیغی کرا.
لەو چالاکییە تەبلیغییەدا زۆر ناوچە و گەڕەک و شوێنی تایبەت بە وێنەی رێبەرانی شەهید و دروشم و تڕاکتی تەبلیغیی حیزب ڕازانەوە.
بەشێک لەو شوێنانەی لە پیرانشار چالاکیی تەبلیغییان تێدا کراوە بریتین لە: دەورووبەری مزگەوتی زەرگەتەن، ئەنسار، ئەسحابی کەهف، مام خەلیل، کۆنەخانێ، قەبرستانەکانی زەرگەتەن و کۆنەخانێ، ٢٤ میتری، دەورووبەری جادەی سنوور، کوی خەییام، گەڕەکی محەممەد میرزا، دەوروبەرتی مزگەوتی هیجرەت، کەمەربەندی، کوی نوور، ڕێگاکانی سەرووکانی، شنۆزەنگ و دەورووبەری مزگەوتی حەزرەتی ئیسماعیل.
هەر بەپێی ڕاپۆرتی کۆمیسیۆنی تەشکیلات لە گوندی باغڵووجەی بۆکانیش بە مەبەستی پەیمان نوێكردنەوە لەگەڵ رێبازی شەهیدان، ئەندامان و دۆستانی حیزبی دێمۆكراتی كوردستان سەردانی گۆری شەهید قاسم باقی و چوار شەهیدی دیكەی حیزبی دێموکراتیان لە گوندی باغڵوجە كردوە.
کۆمیسیۆنی تەشکیلاتی حیزبی دێموکراتی کوردستان بەو بۆنەیە دەسخۆشیی لەو پۆلە لە تێکۆشەرانی حیزبی دێموکڕاتی کوردستان کردوە و سڵاوی بۆ ناردوون.
