شەپۆلی دەسبەسەرکردنەکانی ناوەندە ئەمنیەتییەکان لە کوردستان لە ٢٠ کەس تێپەڕی

ناوەندە ئەمنیەتییەکانی سەر بە سپای پاسداران لە دوو حەوتووی ڕابردوودا هەر نەبێ ٢٠ کەسیان لە کوردستان دەسبەسەر کردوە.
بەپێی ڕاپۆرتی پەیامنێری کوردستان‌و کورد لە سەرەتای ئەو مانگە ڕا تا ئێستا لە شاری شنۆ هەر نەبێ شەش کەس لە ناوچەی شنۆ لەلایەن ناوەندە ئەمنیەتییەکان گیراون کە “فەتاح پوور ئەحمەد، سەید لوقمان ئەمینی، لوقمان عەزیزی، سەید جەلال مەحموودی، سدیق بائیکڕام‌و یەعقووب بائیکڕام”یان ناوە.
هاوکات لە شاری مەهابادیش ٥ کەس بە ناوەکانی “مستەفا سوڵدوزی، سیروان مستەفایی، ئەمیر عەبدوڵلازادە، ڕەحیم ئیسماعیلی و خۆشناو ئیسماعیلی” بەتۆمەتی چالاکیی ئەمنیەتی‌و هاوکاریکردنی حیزبە کوردییەکانی دژبەری کۆماری ئیسلامی گیراون.
لە شاری سەردەشتیش چوار کەس بە ناوەکانی “ناسح عەلیخانی، ڕەسوڵ عەلیخانی‌، ئەبووبەکر عەلیخانی‌و عومەر عەبدوڵلاپوور” و لە بۆکانیش کەسێک بە ناوی ” عەلی سورخی” لەلایەن ئیتلاعاتی سپای پاسدارانی ئەو دوو شارەوە گیراون‌و بۆ شوێنێکی نادیار گواستراونەتەوە.
بەپێی ئەو هەواڵانەی بە ناوەندی هەواڵی کوردستان‌و کورد گەیشتوون، زۆربەی ئەو کەسانە یان لە ماڵەکانیان یان لە شوێنی کارەکانیان گیراون‌و تا ئێستا ناوەندە ئەمنیەتییەکان هیچ ڕوونکردنەوەیەکیان سەبارەت بە هۆکاری گرتنیان ئاشکرا نەکردوە.
خەبات مەوولودی، ئەڵماس ڕەزایی و سەروەر مرادی خەڵکی تەنگیسەری سنەو ئاوات شەریفی خەڵکی سەقز چوار کەسی دیکەن کە هەر لە درێژەی ئەو شەپۆلەدا دەسبەسەر کراون.
بەپێی بەدواداچوونی ڕاپۆرتنێری کوردستان‌و کورد هێزە ئەمنیەتییەکان بۆ دەسبەسەرکردنی هیچ کام لەو کەسانە حوکمی دادگایان پێ نەبووەو تا ئێستاش سەرەڕۆیانە لە زیندانەکانی ئیتلاعاتی سپادا بەندکراون.