دەسبەسەرکرانی کەسێکی خەڵکی ناوچەی شنۆ لەلایەن ئیدارەی ئیتلاعاتەوە

ئیدارەی ئیتلاعاتی کۆماری ئیسلامی لاوێکی خەڵکی ئاوایی ” کانی سۆرکێ”ی لە ناوچەی شنۆ دەسبەسەر کردوە.
بەپێی ڕاپۆرتی پەیامنێری کوردستان‌و کورد ئیدارەی ئیتلاعاتی ڕێژیم لە شنۆ ڕۆژی یەکشەممە، ١٣ی پووشپەڕ، سەید جەلال مەحموودی، خەڵکی گوندی” کانی سۆرکێ”ی دەسبەسەرو بۆ شوێنێکی نادیار گواستۆتەوە.
ئیدارەی ئیتلاعاتی شنۆ تا ئێستا هۆکاری گرتنی سەید جەلالی ئاشکرا نەکردوە، بەڵام هەر لە سەرەتای مانگی پووشپەرەوە تا ئێستا تەنیا لە پێنج شاری مەهاباد، بۆکان، شنۆ، سەقز و سەردەشت هەر نەبێ ١٣ چالاکی کورد لەلایەن هێزەکانی وەزارەتی ئیتلاعاتی ئێرانەوە بە تۆمەتی چالاکیی سیاسی‌و ئەمنیەتی بە دژی کۆماری ئیسلامی، دەستبەسەر کراون. یەعقوب و سەدیق بائیکرام لە گوندی قەرەسەقەل دوو کەسی دیکە لەو کەسانەن کە ماوەی دوو حەوتوویە لەلایەن هێزەکانی ئیدارەی ئیتلاعاتەوە دەسبەسەر کراون‌و، تا ئێستاش چارەنووسیان ناڕوونە.