بەڕێوەبەری ناحیەی سیدەكان ئاماری زەرەرو زیانەكانی تۆپبارانی سوپای پاسدارانی ئێران بۆسەر ئەو بەشە ئاشكرا دەكاو دەڵێ خەڵكی سیدەكان زیانێكی زۆریان كردوەو تا ئێستاش خەڵكەكە ترسیان لەوە هەیە دوبارە ناوچەكە تۆپباران بكرێتەوە.
كاروان كەریمخان، بەڕێوەبەری ناحیەی سیدەكان لەلێدوانێكدا بۆ رادیۆ نەوا رایگەیاند، ئێران بۆ لێدانو تۆپبارانكردنی بنکەکانی حیزبی دێموکڕات لە ناوچە سنورییەكان، بەچڕی تۆپبارانی گوندو ئاواییەكانی دەرهۆڵ، بنپەرێزە، كەتینە، بەنێ، بەربزێنو بێركمەی كرد، كە بەو هۆیەوە بە دەیان خێزان ئاوارە بوونو زیانێكی زۆریش بەر هاووڵاتیان كەوت.
ئەو گوتی دوای تۆپبارانەكە، لیژنەیەكمان پێك هێنا بۆ بەراوردی ئەو زەرەرو زیانانەی بەر خەڵک كەوتوەو، دوای كۆكردنەوەی هەموو ئامارەكانیش، زیانەكان بریتین لە سوتانی نزیكەی ١٠ هەزار هێکتار زەوی، سووتانی نزیكەی هەزار بنەداری بەردار، سووتانو لەنێوچونی ٧٠ پورەهەنگ، لەگەڵ سووتانی خەرمانە گەنمو جۆیەكی زۆر، هەروەها نزیكەی ٨٠ ماڵە جوتیارو رەوەند و كۆچەری و گوندنشین، ئاوارە بون.
كاروان كەریمخان دەڵێ ئێستاش ڕەوەند كۆچەرەكان نەگەڕاونەتەوەو، راستە ئێستا رەوشەكە ئارامە، بەڵام خەڵكەكە هەر هەست بە مەترسی دەكەنو لە بارێكی خراپی دەرونی دانو ترسیان لەوە هەیە دوبارە ناوچەكە تۆپباران بكرێتەوە.