حەسەن ڕوحانی دەڵێ کێشەی فیشەکانی مووچە چەند دە میلیۆن تمەنییەکان وانییە هەر تایبەت بە کۆمەڵەی دەوڵەت بێ، بەڵکوو لە هەموو بەشەکانی وڵات وەک دەزگای قەزاییو پاڕلمانیش وەزعەکە هەر بەم جۆرەیە.
لە درێژەی لەقاودرانی مووچەی چەند دە میلیۆن تمەنیی بەڕێوەبەرانی دەوڵەت، ئەندامێکی شوڕای شاری تاران دەڵێ محەممەد باقر قالیباف، شارەداری تاران هەر نەبێ ١٤ ئەوەندەی مووچەو مانگانەکەی وەردەگرێ.
ئەبولفەزل قەناعەتی، ئەندامی هەیئەتی سەرۆکایەتیی شوڕای شاری تاران دەڵێ مووچەی پایەی قالیباف ٨٠٠ هەزار تمەنە، بەڵام ئەو لە مانگدا هەر نەبێ بە شێوەی قانوونی ١٤ میلیۆن تمەن وەردەگرێ.
نۆبەخت، وتەبێژی دەوڵەت دەڵێ پێدانی مووچەی زۆر و دوور لە ڕێوشوێنە باوەکان یەکێک لە سیاسەتەکانی دەوڵەتی ئەحمەدینژادەو ئاوەکە لەوێوە ڕژاوە، بەڵام وتەبێژی دەزگای قەزایی دەڵێ رێکخراوی بازڕەسیی وڵات لە چەند ساڵی ڕابردوودا چەند جار وەزارەتخانەکانو ناوەندە دەوڵەتییەکانی لە پێوەندی لەگەڵ مووچەی زۆری بەڕێوەبەراندا وریا کردۆتەوە.
ئێژەیی ئیدیعای کردوە کە لە نێوان ساڵەکانی ٩٢ تا ٩٥ و لە ماوەی ئەو سێ ساڵەدا هەر نەبێ بە ٥٠ حاڵەتی لادانو سەرپێچییان لە مووچەی مانگانەی بەڕێوەبەرانی دەوڵەتیان زانیوەو شوێنی پێوەندیداریان ئاگادار کردۆتەوە، بەڵام لێیان گەڕاونو بەدواداچوونیان بۆ نەکراوە.
ئەو باسو لە یەکتر لە هەڵڵادانەی کاربەدەستانی حکومەت لە حاڵێک دایە کە حەسەن ڕوحانی، سەرکۆماری ئێران دەڵێ وانییە کێشەی مووچەی زۆری بەڕێوەبەران هەر لە کۆمەڵەی دەوڵەت ڕووی دابێ، بەڵکوو ئەو سەرپێچییانە لە هەموو بەشەکانی دیکەی حکومەت وەک مەجلیس و دەزگای قەزاییو ناوەندەکانی دیکەشدا بەرچاو دەکەوێ.