بەشار ئەسەد: ئێران‌و رووسیە یارمەتیی ئێمە نادەن، داکۆکی لە بەرژەوەندییەکانی خۆیان دەکەن

بەشار ئەسەد، سەرۆک کۆماری سووریە دەڵێ وڵاتانی ئێران‌و ڕووسیە بە هانای ڕێژیمەکەی نەچوون، بەڵکوو بەرگری لە بەرژەوەندییە تایبەتییەکانی خۆیان دەکەن.
دیکتاتۆری سووریە لە وتووێژ لەگەڵ کاناڵی تەلەڤیزیۆنیی “SBS” ی ئۆسترالیادا گوتی: تاران‌و مسکۆ بەرژەوەندیی خۆیان لە سووریەدا هەیەو بەشداریی ئەوان لە شەڕی نێوخۆیی وڵاتەکەی نەک بۆ پشتیوانی لە دەسەڵاتی بەشار ئەسەد، بەڵکوو بۆ ڕاگرتن‌و پاراستنی بەرژەوندییەکانی خۆیانە. ئەو گوتی لە ڕاستیدا ئەو پشتیوانییەی ڕووسیەو ئێران لە سوورییەی دەکەن، زۆر لە پێناو ئەمنیەت‌و بەرژەوندەییەکانی خۆیانە.
سەرۆک کۆماری سوریە لەو وتووێژەدا حاشای لەهەموو بەڵگەو دێکۆمێنتەکانی پێوەندیدار بە ئەشکەنجەی نەیاران، کوشتاری مندالان، ژنان‌و بۆمبارانکردنی ناوچە مەدەنییەکان‌و شوێنی نیشتەجێبوونی خەڵک کردوەو ئیدیعای کردوە ئەوەی ناوەندەکانی مافی مرۆڤ بڵاوی دەکەنەوە هەمووی درۆ و بوختانەو تەنیا دەیانەوێ سووریەو بەشار ئەسەدی پێ بەدناو بکەن.
شایانی باسە بەشار ئەسەد لەو وتووێژەدا هیچ ئاماژەیەکی بە کوژرانی زیاتر لە ٤٠٠ هەزار کەس لە شەڕی نێوخۆیی ئەو وڵاتەو ئاوارەبوونی زیاتر لە 6 میلیۆن کەسی ئەو وڵاتە لە 4 ساڵی ڕابردوودا نەکرد، بەڵام ڕەخنەی لە دەستێوەردانی بیانی گرت، کەچی خۆی لە باسی بەشداریی حیزبووڵای لوبنان، سپای پاسدارانی ئێران‌و دەیان تاقم‌و گڕووپی چەکداری تێرۆریستیی پشتیوانی خۆی نەدا.