لە چەند شاری كوردستان، كۆبوونەوەی كرێكارانو چینو توێژە جۆراوجۆرەكانی كۆمەڵگا بۆ ناڕەزایەتیی دەربڕین بە بارودۆخی نالەباری ژیانیان بەردەوامە.
كۆمەڵێك لە كرێكارانی شیركەتیی ئیدارەی فەننیو حیرفەیی ئیلام، بۆ ناڕەزایەتی دەربڕین بە پێنەدرانی مووچەی مانگی جۆزەردانی خۆیان، لە بەردەم ئەم ئیدارەیە لە تەنیشت تێرمیناڵ كۆبوونەوەو داوای مووچەی دواكەوتووی خۆیان كرد.
كۆمەڵێك لە دەستگێڕەگانی كرماشانیش لە شەقامی زەفەر، بۆ ناڕەزایەتی دەربڕین بە هەوڵی مەئموورەكانی دەوڵەت كە بە بیانووی گرتنی ڕێگە و سەر شەقامەكان ویستوویانە كەل و پەلەكانیان لێ فڕێ بدەنو لە شوێنی كارەكانیان دەریان بكەن، بەرپەرچی مەئموورەكانی دەوڵەتیان داوەتەوەو مەئمورەکانیان ناچار بە پاشەكشە كردوە.
هێزە سەركوتگەرەكانی ڕێژیم بە بیانووی باج وەرگرتنو سەدی مەعبەر یان ڕێكخستنی دەستگێڕەكان، پەلاماری ئەم بڕە شتوومەكانەی ئەوان دەدەنو تاڵانیان دەكەن.
لە لایەكی دیكەشەوە كۆمەڵێك لە خەڵكی كرماشان لە بەردەم فرۆشگای زنجیرەیی تەعاون لە شارۆچكەی سەدرای ئەم شارە كۆ بوونەوەو بۆ ناڕەزایەتی دەربڕین سەبارەت بە گران بوونی نرخی قەند و شەكر ناڕەزایەتییان دەربڕی. ئەم خەڵكە ناڕازییە دەیانگوت مەگەر داهاتی ئێمە زۆر بووە كە لە ماوەی ڕۆژانی ڕابردوودا نرخی شەكر لە ٢٢٠٠ تمەنەوە بۆ ٣٢٠٠ تمەن زیادی كردووە.