هێندێك لە سەرچاوە نێوخۆییەكانی ئێران وێڕای ڕاگەیاندنی بوونی دەیان بەڕێوەبەری دەوڵەتی كە مووچەی زیاتر لە ٤٠ میلیۆن تمەن وەردەگرن، باسیان لە شەپۆلی وەلانرانی كاربەدەستان، بەهۆی بڵاو كرانەوەی فیشی مووچەی بەڕێوەبەرانی دەوڵەتی كردوە.
سایتی “ئینتخاب”و چەند ڕاگەیەنی دیكە نووسیویانە ٣٠٧ كەس لەم بەڕێوەبەرانە كە زیاتر لە ٤٠ میلیۆن تمەنیان مووچە وەرگرتووە بەرەبەرە لە كارەكانی خۆیان دەردەكرێن‌و لەسەر ئەم پۆستانەیان لادەبەن. هەر چەند تا ئێستاش دەوڵەتی حەسەن ڕووحانی ئەم هەواڵەی پشتڕاست نەكردۆتەوە، بەڵام ڕۆژی پێنجشەممەی حەوتووی ڕابردوو یەكەمین شەپۆلی وەلانرانەكان بە لابردنی٤ بەڕێوەبەری گشتیی بانكە گەورەكانی ئێران دەستی پێ كرد.
لەو ڕۆژانەدا لەلایەن ڕاگەیەنەكانی بناژۆخوازانەوە زۆر بە توندی بەدواداچوون بۆ مەسەلەی مووچە دەیان میلیۆنییەكان دەکرێ، بەڵام وا دیارە دەوڵەتیش بە تەمایە هیچ بیانوویەك نەدا بە ڕكەبەرەكانی خۆی، بە تایبەت لە ئێستادا كە تەنیا ١١ مانگ تا هەڵبژاردنەكانی خولی دواتری سەركۆماری كات لە بەر دەستدا ماوە.
لە حاڵێكدا هێندێك لە بەڕێوەبەرانی دەوڵەتی بە هۆی وەرگرتنی مووچە چەندین میلیۆنییەكان وەلانراون، بەڵام هەندێ ناوەندو دامەزراوە لە ئێران هەن كە تا ئێستاش وردەكاریی مووچەی بەڕێوەبەرەكانیان کەس پێی نازانێ.
سپای پاسداران، كۆمیتەی ئیمدادی خومەینی، ستادی جێبەجێ كردنی بڕیاری خومەینی، ناوەندی دەنگ‌و ڕەنگی کۆماری ئیسلامی، دەزگای قەزایی و شوورای نیگابان ئەم ناوەندانەن كە ڕاستەوخۆ لە ژێر چاوەدێریی خامنەیی دان و تا ئێستاش وردەكاریی بڕی مووچەو داهاتی ئەم ناوەندانە بە هیچ شێوەیەك ئاشكرا نەبووە.
لە ماوەی ٢ دەیەی ڕابردوودا، هەوڵ گەلێكی سنووردار بۆ لێكۆڵینەوە و بەدواداوونی ناوەندەكانی ژێر چاوەدێریی ڕێبەری كۆماری ئیسلامی هاتە ئاراوە، بەڵام پاشان مەجلیسی شوورای شیسلامی بڕیاری دا كە ڕێگە بەم ناوەندە نادرێ لێكۆڵینەوەو بەدواداچوون لە ناوەندەكانی ژێر چاوەدێری ڕێبەری كۆماری ئیسلامیدا بكا.
