جێگری وەزیری سەنعەت، كانزا و تیجارەت، بارودۆخی یەكە سەنعەتییەكانی لە شارۆچكە و ناوچە سەنعەتییەكان ڕوون كردۆتەوە.
عەلی یەزدانی لە لێدوانێكدا بۆ هەواڵدەریی “خەبەر ئانلاین” ڕایگەیاند: سەدی ٥٨ی ئەم یەكە سەنعەتییانەی كە لە نێو شارۆچكە و ناوچە پیشەسازییەكانی ئێران داخراون، پێوەندییان بە دەوڵەتی ئەحمەدینژادەوە هەبووە. سەدی ٤٢ی دیكەشیان بۆ ٣ دەوڵەتی دیكە واتە دەوڵەتەكانی ڕەفسەنجانی، خاتەمی و ڕووحانی دەگەڕێتەوە.
ناوبراو وێڕای ئاماژە بە داخرانی كۆمەڵێك لە یەكە بەرهەمهێنەرەكانی دەوڵەتی حەسەن ڕوحانی گوتی: هەموو لایەك پێیان وایە ئەم یەكە بەرهەم هێنەرانە لە دەوڵەتی یازدەیەم داخراون، لە حاڵێكدا كە بۆ نموونە، لە دەوڵەتی ئەحمەدینژاددا بڕیار لەسەر كارخانەی “ئەرج” درابوو.
یەزدانی گوتی تا كۆتایی ساڵی ٩٤ لە سەرتاسەری ئێران ٧ هەزار و ٨٥ یەكەی ناچالاك لە نێو شارۆچكە و ناوچە سەنعەتییەكاندا هەبوو.
ناوبراو وەبیری هێنایەوە، لە نێو ئەم یەكە داخراو و ناچالاكانەدا، ٤ هەزار و ٩٧ یەكە لە مانگی گەلاوێژی ٨٤ تا گەلاوێژی ٩٢ داخراون. بە واتایەكی دیكە سەدی ٥٨ی سەرجەم یەكە پیشەسازییەكانی ئێران لە شارۆچكەو ناوچە سەنعەتییەكاندا، لە سەردەمی دەسەڵاتداریەتیی ئەحمەدینژاد داخراون.
